2030 تیکر ادھی توں ودھ دنیا موٹاپے دا شکار ہو جاوے گی
وچار ڈیسک
July 14th, 2008
دنیا وچ لوکاں دے ودھدے ہوئے ڈھڈاں نوں ویکھدیاں کھوجکاراں دے اک جتھے نے گویڑ لایا ہے کہ 2030 تیکر دنیا دی 58 فیصد آبادی موٹاپے دا شکار ہو جاوے گی۔ کھوج کرن والیاں دا آکھنا ہے کہ دنیا دی اک تہائی آبادی پہلوں ای موٹی یاں بوہت موٹی ہے۔
ایہہ کھوج بڑی اہم گنی جا رہی ہے کیوں جو پوری دنیا وچ موٹاپے بارے سو سالاں وچ لایا جاون والا ایہہ پہلا گویڑ ہے۔ ایس کھوج وچ کھوجکاراں نے دنیا دی 88 فیصد آبادی رکھن والے 106 ملکاں وچوں آنکڑے اکٹھے کیتے سن۔
ایس کھوج دے تت بارے دسدیاں کھوجیاں دسیا کہ ورھے 2005 تیکر دنیا دی 23.2 فیصدجوان آبادی موٹی تے 9.8 فیصد بوہت موٹی سی۔ نیڑے تیڑے 937 ملین بندے موٹے اتے 396 ملین بوہت موٹے سن۔ جے ایسے طرحاں ای موٹیاں دی گنتی ودھدی رہی تے 2030 تیکر موٹیاں دی گنتی 2.16بلین اتے بوہت موٹیاں دی گنتی 1.12 بلین ہو جاوے گی۔
