فرانس اتے سوئٹزرلینڈ دی سرحد تے اک سرنگ وچ فزکس دے علم تے تجربے کرن لئی بنائی جاون والی لیبارٹری کائنات دی سبھ توں ٹھنڈی تھاں ہے۔ خلاء دے دور دراڈے علاقیاں وچ درجہ حرارت منفی 270 ڈگری سینٹی گریڈ دسیا جاندا ہے پر ایس لیبارٹری وچ درجہ حرارت منفی 271 ڈگری سینٹی گریڈ ہووے گا۔
وچار ہے کہ ایس لیبارٹری وچ ہن تیکر دا سبھ توں وڈا تجربہ کیتا جاوے گا جیہدے وچ کجھ اجیہے حالات پیدا کیتے جاون گے جیہڑے 'بگ بینگ' ویلے ہوئے ہوون گے۔ سائنسی نظریئے 'بگ بینگ' موجب ایہہ کائنات اک دھماکے مگروں ہوند وچ آئی جیہدے تت وچ کئی سیارے کائنات وچ کھلر گئے اتے اوتھے کروڑاں ورھیاں وچ ہوون والیاں بدلیاں پاروں زندگی وجود وچ آئی۔
ہزاراں مقناطیسی تاراں نال بنیا ہویا اک پائپ ایل ایچ سی (لارج ہائیڈرون کولائیڈر) بنایا گیا ہے جیہڑا فرانسیسی سرحد تے بنائی جاوان والی لیبارٹری وچ منفی دو سو اکہتر ڈگری سینٹی گریڈ تے لایا جاوے گا۔ ایہہ مقناطیسی تاراں چُوڑی دی صورت وچ ایس طرحاں لائیاں گئیاں ہین کہ اوہ ایس سرنگ وچ 27 کلومیٹر تیکر ایس پائپ وچ لگیاں ہوون گیاں۔
جدوں ایس لیبارٹری وچ تجربہ کیتا جاوے گا تے رشماں مقناطیسی تاراں نال لگے پائپ ایل ایچ سی راہیں وکھرے وکھرے پاسیاں نوں چانن دی ٹورے لنگھدیاں کئی تھاواں تے آپوں وچ ٹکراون گیاں۔ ایہہ ٹکرا طوفانی ہووے گا جیویں 'بگ بینگ' ویلے ہویا ہووے گا۔
لیبارٹری وچ ایہہ ایس قسم دا پہلا تجربہ ہے۔ ایہہ تجربہ ایہو جہے ٹھنڈے ماحول وچ ہووے گا جیہڑا ایہہ ثابت کرے گا کہ کائنات وچ اینی ٹھنڈ کِتے ہور نہیں ہے۔
