آکھیا جاندا ہے کہ تمباکو پین والیاں نوں کینسر ہو جاندا اے پر امریکہ دے کجھ سائنسداناں دی کاہڈ دے نتیجے وچ کینسر دے روگیاں لئی تمباکو دے بُوٹے نال اک ویکسین بنائی گئی ہے۔ کینسر دے روگیاں دے ٹیومر سیل نال لڑن والی ایہہ ویکسین جینیاتی طور تے بنائے گئے تمباکو دے بوٹے نال بنائی گئی ہے۔
کیلیفورنیا وچ سٹینفورڈ یونیورسٹی سکول آف میڈیسن دے ڈاکٹر رون لیوی دا آکھنا ہے کہ ایہہ پہلی واری ہویا ہے کہ اک بُوٹے نوں ایہو جہیا پروٹین بناؤن لئی ورتیا جا رہیا ہے جیہڑا بندے دے پنڈے وچ داخل کیتا جا سکدا اے۔ اوہناں دا آکھنا ہے کہ ایہدے نال کینسر دا علاج بنا کسے سائیڈ افیکٹس دے کیتا جا سکے گا۔ ایس ویکسین دا ٹیچا ایہہ ہے کہ بندے دے اپنے پنڈے نوں ایس قابل کیتا جا سکے کہ اوہ کینسر دے روگ نال لڑ سکے۔
ایس ٹیکنالوجی نال اک ایہو جہیا وائرس بنایا جاندا اے جیہڑا تمباکو دے پتیاں تے اثر کردا اے۔ روگی دے پنڈے وچوں کینسر والے خلیئے لے کے ایس وائرس نال رلائے جاندے نیں۔ فیر ایس وائرس نوں تمباکو دے بوٹے وچ رکھ دتا جاندا اے۔ جدوں تمباکو دے پتے نوں تھوڑا جہیا چھلیا جاندا اے تے ایہہ پروٹین والی فیکٹری بن جاندا اے جیہدے نال کینسر دے علاج لئی ویکسین بندی اے۔
پروٹین بناؤن دے دوجے طریقے جیویں کہ جانوراں دے پنڈے وچ وائرس رکھ کے پروٹین بناؤنا اک لما کم اے تے ایہدے وچ مہینے لگ جاندے نیں۔ پر تمباکو دے بُوٹے والا طریقہ سوکھا تے چھیتی کم کرن والا اے۔ ایہدے نال اک ہفتے وچ ای پروٹین بن جاندا اے۔
جدوں ایس ویکسین نوں کینسر دے سولاں روگیاں تے ورتیا گیا تے اوہناں وچوں 70 فیصد روگیاں دا مدافعتی نظام چنگا ہونا شروع ہو گیا تے کسے تے کوئی بھیڑا اثر نہیں پیا۔ ڈاکٹر لیوی دا آکھنا ہے کہ اسی طریقے نال سستی تے سوکھی ویکسین بنائی جا سکدی اے۔
