سویڈش کاہڈو کہندے نیں تھکیواں، ڈپریشن تے نیندر دی کمی مرداں وچ شوگر دا مریض بنن دے امکان ودھاوندا ہے۔ کاہڈوواں دا دعویٰ ہے جو اوہ مرد جیہڑے بوہتے نفسیاتی دبا دا شکارن ہوندے ہین اوہناں وچ ٹائپ ٹو ذیابیطس ہوون دے امکان دوجیاں دے مقابلے وچ دونے ہوندے ہین۔ کاہڈواں موجب ذہنی دبا ہارمونز تے دماغ دے کنٹرول تے اثر پاوندا ہے۔
ایس کاہڈ موجب 1938 توں 1957 وچکار پیدا ہوون والے 2127 تے 3100 زنانیاں دا معائنہ کیتا گیا پر زنانیاں وچ انج دے کوئی اشارے نہیں ملے۔سائنسداناں نے کاہڈ وچکار صحیح گلوکوز لیول والے بندیاں توں اوہناں وچ ذہنی دبا، تھکیواں، ڈپریشن تے انسومینیا دیاں نشانیاں دے بارے پچھیا دسیا تے پھیر اٹھ توں دس ورہے دے وقفے دے وچکار اہناں بندیاں وچ شوگر دی موجودگی نوں پرکھیا گیا۔
ایس توں ایہہ پتہ لگیا ہے جو اوہ بندے جنہاں نوں نفسیاتی دبا دا بوہتا ساہمنا رہیا اوہناں وچ شوگر دے مریض بنن دا امکان ہور بندیاں دے مقابلے وچ دوگنے توں وی ودھ سی۔ کاہڈ وچکار جنہاں زنیاں دے ٹیسٹ کیتے گئے اوہناں وچ انج دی کوئی علامت ویکھن نوں نہیں لبھی۔
ایس کاہڈ وچ رلتی سویڈش پروفیسر اینڈرز اکیوم دا کہنا ہے جو ایہہ گل پہلے توں ہی سارے جاندے ہین جو ذہنی دبا تے ڈپریشن دل دی بماری دا کارن بن سکدا ہے پر ہن اہناں نوں شوگر دا وڈا کارن وی سمجھیا جاسکدا ہے۔
چیتے رہوے جو برطانیہ وچ ایس ویلے گھٹو گھٹ تئی لکھ بندے انج دے ہین جنہاں وچ شوگر دی بماری پتہ لگی ہے تے اک گویڑ موجب پنج لکھ بندے انج دے ہین جیہڑے شوگر دا شکار ہین پر اوہناں نے حالی ایس دا معائنہ نہیں کروایا۔
