اک نویں کاہڈ موجب برطانیہ وچ ہر روز دس لکھ توں ودھ بغیر ورتن دے دہی دے ڈبے کوڑے وچ سٹ دتے جاندے ہین۔انج ہر سال ضائع ہوون والے دہی دے ڈبیاں دی گنتی اڑتالی کروڑ چالی لکھ بن دی ہے۔ ایہہ کاہڈو رپورٹ اک انج دے ویلے ساہمنے آئی ہے جدوں دنیا نوں غذائی وخت دا مقابلہ ہے تے افریقہ وچ ہر سال لکھاں بندے غذا دی کمی کارن مر جاندے ہین۔
تے سوال ایہہ ہے جو ایہہ کیویں پتہ لگیا؟
ہاں تے ایس دا سدھا جواب تے ایہہ ہے جو ایس لئی بوہت محنت کرنا پئی۔ ایس سلسلے وچ انگلینڈ تے ویلز دے دو ہزار اک سو اٹھتی گھراں توں کٹھے ہوون والے کوڑے نوں گھر والیاں دی اجازت نال ویکھیا گیا۔ اک ٹیم نے غذائی تے غیر غذائی کوڑے نوں وکھرا کیتا تے مگروں غیر غذائی حصے نوں ضائع کر دتا۔
غذائی کوڑے دے پچھانے جاون والے حصیاں نوں وکھو وکھ کیٹیگریاں وچ لکھیا گیا تے ان پچھاتے مواد نوں لیس دا کمپازٹ دی کیٹیگری وچ پا دتا گیا۔
کاہڈو ٹیم دی اک رکن باربرا لیچ موجب پچھانے جاون والے مواد ولوں ہر طرحاں دی تفصیل لکھی گئی۔ ایس توں مگروں ضائع کرن والی خوراک نوں پیکنگ دے بغیر تولیا گیا تاں جو ایس گل دا گویڑ لایا جاسکے کہ جے اہنوں ضائع نہ کیتا جاندا تے کنی بچت ہوندی۔
ظاہر ہے ایہہ کاہڈ صرف دہی تے ہی نہیں سی۔ سگوں کاہڈو ٹیم نے ہر قسم دا حساب کتاب لایا۔ مثال دے طور تے ایہہ گل وی ساہمنے آئی جو چوتالی لکھ سیب تے باراں لکھ سو سیج ہر سال کوڑے وچ سٹ دتے جاندے ہین۔
