امریکی سائنس دان اک انج دی دوا دی تیاری دے نیڑے اپڑ گئے ہین جیس دے ورتن نال جسمانی ورزش نہ کرن والے بندے وی ورزش دے کجھ فیدے چک سکن گے۔
جرنل سیل موجب امریکی کاہڈوواں دے کول ایس ویلے دو انج دیاں دوائیاں یاں ' فٹنس پلز ' ہین جنہاں دے ورتن نال پٹھے مضبوط تے سٹیمنا ہی نہیں ودھدا سگوں ایہہ گولی چربی ساڑن وچ وی مدد دے سکدی ہے۔
اہناں گولیاں دیاں تجربیاں لئی چوہیاں نوں ورتیا گیا تے تجربیاں وچکار ایہہ ویکھن وچ آیا جو چوہیاں دے دوڑن دی خوبی چوتالی فیصد ودھی تے اہناں تجربیاں دے مڈھ تے کہیا جاسکدا ہے جو کسے سکھلائی توں بغیر انسان دے دوڑن دی خوبی وی ودھ سکدی ہے۔
اہناں گولیاں دی تیاری نوں پھڈے والا منیا جارہیا ہے کیوں جو خیال ہے کہ کھیڈاں دی دنیا وچ اوہناں نوں غلط ورتیا جاسکدا ہے۔ پر ایس کاہڈ وچ رلتی مرکزی سائنسدان کیلیفورنیا دے سالک انسٹیٹیوٹ دے پروفیسر رونلڈ ایونز دا کہنا ہے جو اوہناں نے اک انج دا ٹیسٹ وی بنایا ہے جیس ہیٹھ کھڈاریاں دے خون تے پیشاب دے نمونیاں وچ ایس دوائی دا پتہ لگ جاوے گا۔
پروفیسر رونلڈ ایونز ایہہ وی مندے ہین جو اہناں دوائیاں نوں پٹھے خراب کرن والیاں بماریاں دے علاج وچ یاں پھیر شوگر ورگیاں بماریاں دا شکار بندیاں وچ ورزش دے فیدیاں وچ بہتری لیاون لئی ورتیا جاسکدا ہے۔
ایہہ دو دوائیاں جنہاں نوں AICAR تے GW1516 دے ناواں نال پچھانیا جاندا ہے اک انج دے جین تے اثر پاندیاں ہین جیہڑا پٹھیاں دے ودھن پھلن تے کم کرن دی خوبی نوں کنٹرول کردا ہے۔'PPAR-Delta ناں دا ایہہ جین ہور کئی جینز دی کارگزاری کنٹرول کرن دی خوبی وی رکھدا ہے تے اہنوں کنٹرول کرن نال جسم دے نظام تے ظاہری اثر پے سکدا ہے۔ تجربیاں وچکار چوہیاں وچ وی ایس جین وچ بدلی دے نتیجے وچ پٹھیاں دی افزائش ساہمنے آئی۔
پروفیسر رونلڈ ایونز موجب پکی گل ہے اک دن انج دا آوے گا جدوں ایہہ دوائیاں انسانی ورتوں وچ آسکن گئیاں۔ اوہناں نے کہیا اوہ لوک جیہڑے باقاعدگی نال ورزش کردے ہین اوہناں نوں ایہہ دوائی کارکردگی ودھاون وچ مدد دے سکدی ہے تے اوہ لوک جیہڑے ورزش نہیں کردے اوہ ایس دوائی دے ورتن نال ورزش دے کجھ فیدے تے حاصل کر ہی سکدے ہین۔
