اقوام متحدہ نے فضائی آلودگی روکن لئی اپنی کوشش دے طور تے اک منصوبہ شروع کیتا ہے جیس ہیٹھ اوہدے دفتراں وچ ائیر کنڈیشن گھٹ ورتیا جاوے گا۔ ' کُول انشی ایٹو'' پروگرام ہیٹھ اقوام متحدہ ہر مہینے اک لکھ ڈالر بچا سکے گی تے ایس دے تت وچ آلودگی کھلارن والیاں گیساں دا اخراج گھٹ جاوے گا۔
اگست وچ اقوام متحدہ دے دفتراں وچ تھرمو سٹیٹ نوں بائی ڈگری سنٹی گریڈ توں ودھا کے پنجھی ڈگری سنٹی گریڈ کر دتی جاوے گی جیس نال ائیر کنڈیشن گھٹ ورتیا جاوے گا۔ آس کیتی جارہی ہے جو ایس فیصلے ہیٹھ اقوام متحدہ دے سفارتکار اپنی ٹائی گھر چھڈ کے آون گے تے فری سٹائل کپڑے پاون گے۔
سیکرٹری جنرل بان کیمون دی ترجمان میشل مونٹاس نے دسیا جو اگست وچ اقوام متحدہ نوں اک لکھ ڈالر دی بچت ہووے گی تے جے ایس منصوبے تے پورا سال عمل کیتا جاوے تے اک ملین ڈالر دا فیدا ہووے گا۔
ایہدا دوجا مقصد ایہہ وی ہے جو اقوام متحدہ دے سفارتکار کوٹ تے ٹائی توں نکلن تے عام کپڑیاں وچ دفتری کماں لئی آون۔ایہدی مثال سیکرٹری جنرل بان کمیون نے جمعے نوں دتا جدوں اوہ دفتر بناء ٹائی دے تے کورٹ دے ہاف شرٹ پا کے دفتر اپڑے۔ اقوام متحدہ دے ماہراں دا گویڑ ہے جو انج دے فیصلے نال اگست وچ آلودگی کھلارن والے کاربن ڈائی آکسائیڈ گیساں دے اخراج وچ تن سو ٹن کمی ہو جاوے گی۔ اقوام متحدہ دا ایہہ فیصلہ ایس سال ست سالہ کیپیٹل ماسٹر پلان دا حصہ ثابت ہورہیا ہے جیس ہیٹھ ایہدی عمارت نوں ماڈرن تے گرین بنایا جارہیا ہے۔
