امریکہ وچ اک رپورٹ موجب ایڈز دی بماری دا شکار لوکاں دی گنتری پچھلے گویڑاں توں کِتے ودھ ہے۔ حالیں کیتے گئے حساب ایڈز دے نویں مریضاں دے ساہمنے آون نال لائے گئے ہین۔ امریکہ وچ قائم بماریاں تے قابو پاون تے اوہناں دے بچاء دے ادارے 'سینٹر فارڈیزیز کنٹرول اینڈپریونشن ' موجب چھونجاہ ہزار لوک ہر سال ایچ آئی وی دا شکار ہوندے ہین جیہڑے پچھلے گویڑاں توں چالی فیصدودھ ہے۔ امریکن فاؤنڈیشن فار ایڈز سرچ دے اک ترجمان موجب ایس حساب کتاب نال ظاہر ہوندا ہے جو امریکی حکومت ایس وبا نوں ڈکن لئی کجھ نہیں کر رہی۔
کجھ غیر سرکاری ستھاں لئی کم کرن والے کارکناں دا خیال ہے جو بوہت سارے لوک بدنامی توں بچن لئی ایہدا ٹیسٹ ہی نہیں کرواندے۔ ایس سینٹر دے پردھان ڈاکٹر کیون فینٹن دا کہنا ہے جو پندراں توں اٹھاراں ہزار امریکی شہری ہر سال ایڈز دے مرض نال مردے ہین۔ اوہناں کہیا ایہہ وبا جاری ہے تے ایس وچ ہم جنس پرست، زنانیاں مرداں دوہواں دے جنسی کم کرن والیاں تے سیاہ فام مرد تے زنانیاں تے بوہتا اثر پے رہیا ہے۔
امریکی میڈیکل ایسوسی ایشن وچ چھپن والے حساب موجب ثابت ہوندا ہے جو سیاہ فام امریکیاں نوں ایہہ بماری لگن دا خطرہ ست گنا ودھ ہوندا ہے۔ ایچ آئی وی دا شکار پنجھی فیصد لوکاں نوں ایہہ جانکاری ہی نہیں ہے جو اوہنوں نوں ایہہ بماری ہو گئی ہے۔
