ایران دا کہنا ہے جو اوہنے اک راکٹ نوں خلا وچ گھلن دا کامیاب تجربہ کیتا ہے۔ ایہہ راکٹ ملک وچ بنے ہوئے سیٹلائٹ نوں خلا وچ کھڑ سکدا ہے۔ اتوار نوں پربندھیاں نے خبر دتی ہے جو سیٹلائٹ کھڑن والے ایس راکٹ دا ناں ' سفیر' ہے۔ ایس توں پہلوں میڈیا نے اطلاع دتی سی جو ایران نے ملک وچ بنے ہوئے سیٹلائیٹ نوں مدار وچ چھڈن دا تجربہ کیتا ہے۔
ایران دی خبراں اپڑاون والی ایجنسی فارس دا کہنا ہے جو صدر محمود احمد نژاد لانچ کرن دی کاروائی دے موقعے تے موجود سن۔ سرکاری ٹیلی ویژن تے راکٹ نوں فضا وچ اُچیاں ہوندیاں وکھایا گیا ہے۔
ایران نے ایس سلسلے وچ پہلا تجربہ فروری وچ کیتا سی۔ اوہ کئی سالاں توں خلائی پروگرام نوں جاری رکھے ہوئے ہین تے اوہناں دا کہنا ہے جو اوہ کاہڈ تے ٹیلی کیمیونیکیشن لئی اپنا سیٹلائیٹ ورتنا چاہندا ہے۔
