امریکہ دے 31 شہراں تے قصبیاں وچ ہن انج دیاں گڈیاں سڑکاں تے لیاندیاں جارہیاں ہین جنہاں نوں مستقبل دیاں کاراں کہیا جاندا ہے۔ امریکہ دے محکمہ توانائی تے ٹرانسپورٹ تے کیلی فورنیا فیول سیل پارٹنر شپ دی سانجھ نال امریکہ دی نیشنل ہائیڈروجن ایسوسی ایشن تے 9 آٹو موبائل کمپنیاں نے ہائیڈروجن نال چلن والیاں سیکڑیاں کاراں تیار کیتیاں ہین۔ جنہاں دی واشنگٹن ڈی سی وچ نمائش کیتی گئی۔
ظاہر وچ تے ایہہ کار سڑک تے چلن والیاں دوجیاں گڈیاں ورگی ہی لگدی ہے پر اہنوں پیٹرول دی لوڑ نہیں۔ ایہہ چلان لئی ہائیڈروجن گیس ورتی جارہی ہے۔ ایہہ گڈیاں کاربن والا دھواں نہیں چھڈ دیاں سگوں اوہناں دے پچھے لگے پائپ نال پانی دا اخراج ہوندا ہے۔ حالیں واشنگٹن ڈی سی وچ ہائیڈروجن روڈ ٹور 2008 دے ناں توں ہوون والی ایس نمائش وچ سیکڑیاں بندے ہائیڈروجن نال چلن والیاں کاراں دی ٹیسٹ ڈرائیولئی جمع ہوئے۔
امریکہ دے محکمہ ٹرانسپورٹ دے پال بروبکر دا کہنا ہے جو اسیں ٹرانسپورٹ دے اک نویں دور وچ وڑھ رہے ہین۔ اوہناں دا کہنا سی جو ٹرانسپورٹ دا ایہہ نواں دور ہائیڈروجن بیڑیاں، وٹاندرے دے ایندھن تے پھیر ورتون والے ایندھن دے ورتن دا دور ہووے گا۔
کاراں بناون والیاں نو کمپنیاں سارے امریکہ وچ اپنی ایس نویں ٹیکنالوجی دے وکھالے کر رہیاں ہین تے اوہناں دا دعوی ہے جو ہائیڈروجن نال چلن والیاں گڈیاں چھیتی ہی کمرشل پدھر تے ملن گئیاں۔ نمائش وچ شریک کار کمپنیاں ہر سٹاپ تے ہائیڈروجن نال چلن والیاں کاراں دا وکھالا کرن دے نال راہگیراں نوں کار وچ سواری دی پیشکش کردیاں ہین۔
اک ماہر دا کہنا سی جو شروع وچ تسی گڈی دے پچھلے حصے وچ موجود ٹنکی وچ ہائیڈروجن بھردے او تے ایہہ ہائیڈروجن ایندھن دی نلکی وچوں لنگھ کے آکسیجن توں ملدی ہے۔ جیس نال پیدا ہوون والے کیمیکل ری ایکشن توں بجلی پیدا ہوندی ہے۔ پھیر ایہہ بجلی یاں تے سدھی ساہویں یاں بیٹری راہیں گڈی چلاون دے کم آوندی ہے جیس دے نتیجے وچ گڈی دے پچھلے پائپ توں پانی نکلدا ہے۔
ہائیڈروجن دی تیاری نال ماحول تے آلودہ نہیں ہوندا پر ایہہ اک مہنگا کم ہے۔ گڈیاں وچ ہائیڈروجن بھرن دا کم وی انج ہی ہے جیویں گیس یاں پیٹرول بھرن دا کم ہے پر واکس ویگن بناون والے ادارے دے نمائندے جان ٹل مین موجب امریکہ وچ گڈیاں وچ ہائیڈروجن بھرن دے صرف کجھ ڈسٹربیوشن سینٹرز ہین۔
اوہناں دا کہنا سی جو ہائیڈروجن ٹور دا مقصد ایہہ دسنا ہے جو ایہہ کاراں ہر طرحاں دی ڈرائیوئنگ دے قابل ہین۔ لما پینڈا کرسکدیاں ہین پر ہائیڈروجن کاراں لئی جیہڑا انفراسٹرکچر چاہی دا ہے اوہ موجود نہیں۔ ایہدے توں بغیر اسیں اہناں کاراں نوں مارکیٹ وچ نہیں لیا سکدے۔ ایس لئی ہائیڈروجن اسٹیشنز دی لوڑ ہے۔
ٹل مین موجب ہائیڈروجن والیاں کاراں اک گیلن وچ سٹھ میل چلدیاں ہین تے اہناں نال ماحول آلودہ نہیں ہوندا۔ ایس نمائش وچ امریکہ دے محکمہ ٹرانسپورٹ ولوں ہائیڈروجن نال چلن والیاں کاراں دی صنعت لئی سرمایا دیون دا وی اعلان کیتا گیا۔ پر آٹو انڈسٹری دے نمائندیاں دا کہنا ہے جو ہائیڈروجن کاراں دا تجربہ کمرشل پدھر تے اُس ویلے کامیاب ہووے گا جدوں اوہناں لئی مناسب انفرا سٹرکچر وی دتا جاوے گا۔
