شمسی توانائی نال چلن والے اک بناء پائلٹ دے برطانوی طیارے نے غیر سرکاری طور تے سب توں لمی اُڈاری دا ریکارڈ بنایا ہے۔ ذیفائر سکس ناں دا ایہہ جہاز تناں دناں توں بوہتا چر اُچا اڈ دا رہیا تے رات دے ویلے شمسی توانائی نال چارج کیتیاں ہوئیاں بیٹریاں ورت دا رہیا۔ ایس طیارے دی اُڈان بیاسی گھنٹے تے سینتی منٹ سی۔
ایس برطانوی طیارے دی اُڈاری نے اپنا ہی نہیں سگوں اک امریکی روبوٹ نال چلن والے بناء پائلٹ طیارے ' گلوبل ہاک ' دا تریہہ گھنٹے تے چویہہ منٹ دا ریکارڈ توڑ دتا۔ایس اُڈاری دا وکھالا امریکی فوج لئی کیتا گیا سی جیہڑی کہ اپنی زمینی فوج دی مدد لئی نویں ٹیکنالوجی لبھ رہیا ہے۔ ذیفائر ورگے طیارے فوجی اہمیت دے ٹھکانیاں دا کھوج لاون لئی فیدے مند ہوسکدے ہین۔ اہناں طیاریاں نوں میدان جنگ وچ سنیہا لے کے پھیر نشر کرن لئی وی ورتیا جاسکدا ہے۔
برطانوی ڈیفینس اینڈ ریسرچ فرم قینٹق دے کرس کیلر دا کہنا ہے ' بناء پائلٹ دے ایہہ طیارے روایتی طریقیاں تے چلن والے طیاریاں ایتھوں تیکر کہ سیٹلائیٹ طیاریاں توں وی ودھ فیدے دے سکدے ہین'۔مسٹر کیلر نے ہور کہیا جو ذیفائر دے باقاعدہ ورتن وچ ہور دو سال لگ سکدے ہین کیوں جو ایہدے وچ حالی ہور بہتری دی گنجائش ہے۔'
