گوگل نے انٹرنیٹ تے ویب سائٹاں ویکھن لئی ورتے جاون والے مائیکروسوفٹ کمپنی دے 'انٹرنیٹ ایکسپلورر' اتے 'موزیلا' دے فائرفوکس دی مقابلے تے اپنا اوپن سورس ویب براؤزر کڈھ دتا ہے جیہڑا دنیا دیاں ٠٤ بولیاں وچ ہووے گا۔ کمپیوٹر دے اوپن سورس پروگرام اوہ ہوندے نیں جیہناں وچ ورتن والا اپنی لوڑ موجب بدلی کر سکدا ہے۔ گوگل نے اپنے نویں براؤزر نوں کروم دا ناں دتا ہے جیہدے وچ ملٹی میڈیا اتے گرافکس ول اچیچا دھیان دتا گیا ہے۔
کروم ناں دے ایس براؤزر نوں بھلک دیاں لوڑاں نوں ویکھدیاں بنایا گیا ہے۔ ایس پروگرام دا تجرباتی ورژن حالے سو ملکاں وچ مائیکروسافٹ ونڈوز لئی جاری کیتا گیا ہے جدوں کہ دوجے آپریٹنگ سسٹم میکنٹوش اتے لینکس لئی ایہہ براؤزر کجھ کویل نال جاری کیتا جاوے گا۔
نویں براؤزر بارے گوگل کمپنی دی پراڈکٹ مینجمنٹ دی نائب صدر سندر پچائی نے اک بلاگ وچ لکھیا ہے کہ ساڈے چت چیتے ایہہ گل ہے کہ نویں براؤزر تے ہور گوہ لوڑیندا اے۔ اوہ لکھدیاں نیں کہ سانوں جو شئے چاہیدی سی اوہ سائٹاں ویکھن لئی اک براؤزر ای نہیں سگوں ویب سائٹاں اتے ہور پروگراماں لئی اک نواں پلیٹ فارم سی تے اوہدی تیاری لئی اسیں کم کیتا ہے۔
گوگل ایس توں پہلوں پکاسو، گوگل ڈاکومینٹس تے گوگل میپس ورگیاں سوکھتاں دے چکیا ہے تے ہن ایہہ نواں براؤزر مائیکروسافٹ دی پردھانی نوں مکاؤن دا اک حیلہ ہے۔ مائیکروسافٹ دے ویب براؤزر انٹرنیٹ ایکسپلورر نوں دنیا وچ انٹرنیٹ ورتن والیاں دی ٠٨ فیصدی گنتی ورتدی ہے۔
