اک جائزے موجب لوکاں دے موسیقی دے ذوق تے اوہناں دی ہستی وچ ڈوہنگا تعلق ہوندا ہے۔ ایہہ کاہڈ ساری دنیا وچ چھتی ہزار لوکاں تے کیتی گئی ہے۔ ہیریٹ واٹ یونیورسٹی دے پروفیسر ایڈرین نارتھ دی ایہہ کاہڈ موسیقی تے شخصیت دے موضوع تے ہے۔ کاہڈ موجب کلاسیکی موسیقی دے شوقین شرمیلے ہوندے ہین۔ جدوں کہ ہیوی میٹل دے شوقین پرسکون تے آپنے آپ وچ مست لوک ہوندے ہین۔ پروفیسر نارتھ نے ایس جائزے نوں ' حیران کرن والا تے اہم '' دسیا۔
اوہناں دا کہنا ہے جو سانوں ہمیش توں ہی لگدا سی جو لوکان دے موسیقی دے ذوق تے اوہناں دی شخصیت وچ کوئی تعلق ہوندا ہے انج پہلی وار ہویا ہے کہ ایس سلسلے وچ تفصیلی کاہڈ کڈی گئی۔اوہناں کہیا ایس ریسرچ نوں مارکیٹنگ وچ چنگا ورتیا جاسکدا ہے ' جے تہانوں لوکاں دے موسیقی دے ذوق دا پتہ ہووے تے تہانوں پتہ لگے گا جو اوہ کس قسم دا بندہ ہے۔
موسیقی دے ذوق تے ہستیاں تے نظر پائی جاوے تے جاز دے شوقین عزت نفس نوں بوہت اہمیت دیون والے، تخلیقی خوبیاں دے مالک تے ملنسار لوک ہوندے ہین تے بوہتے لوکاں وچ گھلدے ملدے نہیں۔ اوپرا دے مداح عزت نفس دا خیال کرن والے تخلیقی، مہذب تے نرم سبھاء دے ہوندے ہین۔ ویسٹرن تے کنٹری میوزک دے شوقین محنتی تے ملنسار سبھا دے ہوندے ہین۔
جائزے موجب راگا سنن والے عزت نفس دا خیال کرن والے ہوندے ہین پر بوہتے محنتی نہیں ہوندے پر تخلیقی تے شائستہ ہوندے ہین۔ بولی ووڈ موسیقی دے مداح تخلیقی تے ملنسار ہوندے ہین۔ راک میوزک دے شوقین تخلیقی تے ہوندے ہین پر نہ تے بوہتے محنتی ہوندے ہین تے نہ ہی بوہتے ملنسار پر ایہہ لوک شائستہ ہوندے ہین۔
