چرچ ڈارون دے مرن دے 126ورھیاں مگروں اوہدے کولوں معافی منگے گا
وچار ڈیسک
September 15th, 2008
انگلینڈ دا چرچ چارلس ڈارون دے 126 ورھیاں مگروں اوہدے ارتقاء دے نظریئے نوں غلط سمجھن پاروں اوہدے کولوں باقاعدہ معافی منگے گا۔ چرچ ایہہ معافی سدھی چارلس ڈارون کولوں منگے گا جیہدے وچ اک لکھت پڑھی جاوے گی کہ اوہدے نظریئے نوں سمجھن وچ چرچ نے جذباتی غلطی کیتی۔ نال ای اگونہے وچاراں دی مخالفت کرن تے چرچ اپنا محاسبہ کرے گا۔
ایہہ معافی نامہ چرچ دے مشن تے لوک سانگیاں دے ڈائریکٹر ریو مالکولم براؤن نے لکھیا ہے۔ معافی نامے وچ لکھیا گیا ہے کہ چارلس ڈارون دا نظریہ سمجھن وچ چرچ نے اوہو ای غلطی دوہرائی جیہڑی ستارہوریں صدی وچ گلیکیو دے فلکیات دے نظریاں نوں سمجھن وچ کیتی گئی سی۔
چرچ دی ویب سائٹ تے اک لکھت لکھی جاوے گی ''چارلس ڈارون: تیرے جمن دے 200 ورھیاں مگروں انگلستان دا چرچ تینوں تے تیرے نظریاں نوں غلط سمجھن تے تیرے کولوں معافی چاہوندا ہے۔ سانوں آس ہے کہ ایہدے نال غلطی دی کجھ تلافی ہووے گی''۔
