اک سائنسی کاہڈ موجب اوہ زنانیاں جنہاں دا اک واری حمل ضائع ہوچکیا ہے اوہناں دا پھیر حمل ضائع ہوون دا خطرہ ودھ جاندا ہے جے اوہناں دا وزن بوہتا ہووے یاں اوہ موٹاپے ورگی بماری ' اوبیسٹی ' دیاں روگی ہین۔
لندن دے سینٹ میری ہسپتال نے اک کاہڈ وچ 696 انج دیاں زنانیاں تے اسٹڈی کیتی جنہاں دا حمل ضائع ہوون دا کوئی اُچیچا کارن نہیں پتہ لگیا سی۔ ہسپتال دی اک ٹیم نے کینڈا وچ اک پریس کانفرنس وچ دسیا کہ موٹیاں زنانیاں دے حمل ضائع ہوون دے امکان اوہناں دے وزن دے کارن تہتر فیصد ودھ جاندے ہین۔
موٹاپے دے علاج دے اک ماہر دا کہنا سی جو حمل دے وچکار وزن گھٹانا اک خطرناک کم ہوسکدا ہے۔ حالانکہ ایہہ گل پہلوں ہی ثابت ہو چکی ہے جو موٹاپے دے کارن نیانے دے جمن تے حاملہ ہوون وچ اوکڑاں آوندیاں ہین پر سینٹ میری ہسپتال ولوں کیتی جاون والی ایہہ انج دی پہلی کاہڈ ہے جیہدے وچ وار وار حمل ضائع ہوون دے کارناں تے کاہڈ کڈھی گئی تے اوہدا تعلق موٹاپے نال جوڑیا گیا۔
جنہاں چھ سو چھیانوے زنانیاں تے کاہڈ کیتی گئی اوہنوں وچوں ادھیاں زنانیاں دا وزن نارمل سی تریہہ فیصد معمول توں بوہتیاں موٹیاںسن تے پندراں فیصد ' او بیس ' سن۔
سائنسی کاہڈ موجب زنانیاں دی عمر جنی ودھدی جاندی ہے اوہناں نوں نیانے جمن وچ اونیاں ہی اوکڑاں ہوسکدیاں ہین پر نویاں کاہڈاں توں پتہ لگیا ہے جو نیانہ جمن وچ پریشانی تے وار وار حمل ضائع ہوون دا اک کارن موٹاپا وی ہے۔ سینٹ میری ہسپتال دی کلینکل نرس اسپیشلسٹ ونی لو دا کہنا ہے جو ایہہ پہلی کاہڈ ہے جیہدے وچ موٹاپے دی بماری یعنی اوبیسٹی تے وار وار حمل ضائع ہوون دے وچکار تعلق سمجھیا گیا ہے۔
اوہناں ہور کہیا جو 'او بیس نزنیاں جنہاں دا حمل ضائس ہوندا ہے اوہناں نوں اپنے موٹاپے دے کارن حمل ضائع ہوون دا ہور خطرہ رہندا ہے۔'
ونی لو نے ایہہ وی کہیا سی کہ جنہاں زنانیاں نوں موٹاپے دی بماری ہے اوہناںنوں اپنا بھار گھٹاون لئی کجھ کرنا چاہی دا تے اوہناں نوں ایس لئی کاؤنسنلنگ دی مدد وی لینی چاہی دی ہے۔
