تنہائی تے پالے دی شکایت لوک روز ہی کردے ہین پر نفسیات دے ماہراں نے پتہ لایا ہے جو اکلاپا لوکاں وچ ٹھنڈ دا کارن بن دا ہے۔ٹورینٹو یونیورسٹی دے ماہراں دی ٹیم نے گل کھولی ہے جو کسے محفل وچ وی آپنے آپ نوں کلا محسوس کرن والیاں نوں کمرے وچ اوہناں لوکاں توں بوہتا پالا لگدا ہے جیہڑے محفل وچ ساریاں نال رچ مچ کے رہندے ہین۔
کاہڈ موجب جیہڑے لوک آپنے آپ نوں کلا محسوس کررہے ہوندے ہین اوہ جوس یاں کوئی پھل لین دی بجائے چاء یاں گرم سوپ پینا پسند کردے ہین۔ برطانیہ دے نفسیات دے ماہراں دا کہنا ہے جو ایس کاہڈ نال اوہناں لوکاں نوں مدد مل سکدی ہے جیہڑے آپنے آپ کلے محسوس کردے ہین اُچیچا سیالاں وچ۔
پہلے جائزے وچ 65 پڑھیاراں نوں دوہواں ٹولیاں وچ ونڈھیا گیا۔ اک ٹولے نے اہناں واقعیاں نوں چیتے کیتا جنہاں وچ اوہناں نوں کسے محفل وچ اکلا کر دتا گیا یاں اوہ آپنے آپ نوں اکلاسمجھ رہے سن جدوں کہ دوجے گروپ نوں اوہ واقعے چیتے کروان لئی آکھیا گیا جنہاں وچ کسے محفل یاں کلب وچ اوہناں نوں سلاہیا گیا۔
ایہدے مگروں اوہناں لوکاں نوں اک کمپیوٹر گیم دتا گیا جیہدے وچ کجھ لوکاں نوں گیند سٹن دا موقع کئی وار دتا گیا تے کجھ نوں گیند نال کھیڈن دا بوہتا موقع نہیں دتا گیا۔
گیم دے مگروں اوہناں لوکاں نوں پچھیا گیا جو اوہ سیب یاں سافٹ ڈرنکس پین دی چاہ رکھدے ہین یاں پھیر گرم گرم کافی دے چاہوند ہین جنہاں لوکاں نوں گیند نال بوہتا کھیڈن دا موقع نہیں دتا گیا سی اوہناں وچوں بوہتیاں نے گرم سوپ یاں کافی دی چاہ ظاہر کیتی۔
ماہراں دا کہنا ہے کہ جنہاں لوکاں نے تتیاں شیواں دی چاہ ظاہر کیتی اوہ نفسیاتی طور تے کلے ہوون کارن انج محسوس کر رہے سن۔
