یورپی یونین ولوں بنائی گئی اک رپورٹ وچ کہیا گیا ہے جو ہن دے مالی بحران توں ودھ عالمی معیشت نوں جنگلاں دے وڈھے جاون نال گھاٹا پے رہیا ہے۔ ایس رپورٹ موجب عالمی معیشت نوں دو توں پنج کھرب ڈالر دا نقصان ہورہیا ہے۔ ایس رقم وچ اوہ نقصان وی رلتی ہین جیہڑے جنگلاں دے وڈھن دے نتیجے وچ ہوندے ہین کیوں جو جنگلاں دا پانی نوں صاف رکھن تے کاربن ڈائی آکسائیڈ نوں جذب کرن وچ اہم کردار ہوندا ہے۔
کجھ لوکاں دا خیال ہے جو ایہہ رپورٹ پالیسی بناون والیاں نوں قدرتی ماحول تے وسیلیاں دی حفاظت تے قائل کرن دی اک کوشش ہے۔ بی بی سی نال گل کردیاں ہوئیاں رپورٹ تیار کرن والی ٹیم دے آگو پاون سکھدیو نے کہیا کہ ماحول دے تحفظ نہ کرن نال ہوون والا نقصان ہن دے مالی بحران توں کِتے ودھ ہے۔
ایہہ بوہتا ہی نہیں سگوں ایہہ مسلسل نقصان ہے جیہڑا کہ ہرسال ہورہیا ہے۔ وال سٹریٹ نے موجودہ مالی بحران دا تخمینہ دو کھرب ڈالر توں گھٹ لایا ہے جدوں کہ حقیقت ایہہ ہے جو جنگلاں دی کمی نال سانوں ہر سال دو توں پنج کھرب ڈالر دا نقصان ہورہیا ہے۔'
ایس رپورٹ وچ کہیا گیا ہے جو جنگلاں وچ کمی دے کارن ایس نال جڑے فیدے وی مکدے جارہے ہین۔
