بجلی نال چلن والیاں شیواں بناؤن والی جگت جانو کمپنی سونی الیکٹرانک نے دنیا دا سب توں پتلا ٹی وی بنا دتا ہے جیہڑا اک سی ڈی دی ڈبی جنا موٹا ہے۔
بوہت ای پتلا (الٹرا تِھن) ٹی وی جیہدا ناں سونی بریویا زید ایکس ون رکھیا گیا ہے، چڑھدے ورھے جنوری وچ منڈی وی آ جاوے گا۔ سونی نے ایہہ ماڈل این ای سی دے گرینڈ ڈیزائن شو وچ وکھایا ہے۔
شو ویکھن والیاں نے بڑی حیرانی نال دسیا ہے کہ ایہہ مننا اوکھا ہو جاندا ہے کہ کوئی اینی پتلی شے اینی ودھیا تصویر وکھا سکدی ہے۔ شروع وچ ایس ٹی وی دا مُل 3500 پونڈ رکھیا گیا ہے۔
سونی کمپنی دے پراڈکٹ مینجر دا آکھنا ہے کہ ایہدے ورگی کوئی وی شے حالے منڈی وچ نہیں لبھدی۔ ایہہ اک اچیچی وست ہے جیہڑی لوکاں نوں اپنے ول کھچے گی۔
