اک نویں کاہڈ وچ ایہہ گل ساہمنے آئی ہے کہ جمن والا بال صرف ٹبر نوں خوشی ہی نہیں دیندا سگوں ماں نوں وی سیانا بنا دیندا ہے۔
پہلوں کیتی جاون والی کھوج وچ ایہہ دسیا گیا سی جو گبھن زنانیاں دی دماغی صلاحیت گھٹ جاندی ہے۔ ہُن رچمنڈ یونیورسٹی دے سائنسداناں دے اک جتھے نے ایہہ کاہڈ کڈھی ہے کہ بال جمن نال ماں بہتی سیانی ہو جاندی ہے۔
کھوجیاں موجب ماں بنن والی زنانی اپنے دماغ نوں نویں سریوں اُساردی ہے تاں جو اوہ اپنی مامتا نال بال دی راکھی کر سکے۔ تے جدوں بال جم پیندا ہے تے ماں دی سوجھ ہور ودھ جاندی ہے۔
سائنسداناں نے ایہہ تتھ چوہیاں تے کیتی اک کھوج راہیں کڈھے ہین۔ اہناں راہیں پتہ لگا کہ جدوں بال جمیا تے چوہی بہتی بہادر اتے اپنے بال لئی خوراک لبھن وچ بہتی تیز ہو گئی۔ سائنسداناں دا آکھنا ہے کہ سوجھ دا ایہہ ودھنا ویلے دے ویلے نہیں سگوں ساری حیاتی لئی ہوندا ہے۔
