اک نویں سائنسی کھوج موجب جے تسیں لمی حیاتی جیونا چاہوندے ہو تے روز چاء تے کافی پیو تے نال چاکلیٹ کھاؤ۔
برطانیہ دی یونیورسٹی آف لیڈز دے پروفیسر گیری ولیم سن دا آکھنا ہے کہ چاء ، کافی اتے چاکلیٹ اوہناں کجھ کھابیاں وچوں ہین جیہناں دی ورتوں نال تسیں لمی حیاتی جی سکدے ہو۔
پروفیسر ولیم سن نے ویہہ کھابیاں دی اک لسٹ بنائی ہے جیہناں دی ورتوں نال بندے دی حیاتی ودھ جاندی ہے۔ ایس لسٹ وچ اوہ سارے کھابے رلتی ہین جیہناں وچ قدرتی مادے ہوندے ہین جیہناں نوں سائنسی بولی وچ پولی فینولز آکھیا جاندا ہے۔ ایہہ کھابے صحت نوں چنگا بناؤندے نیں تے اچیچا دل دیاں روگاں نوں روکدے نیں۔
پروفیسر دا آکھنا ہے کہ اہناں کھابیاں نال عمر ودھن دا عمل ہولی ہو جاندا ہے کیوں جے ایہہ ویلے دے نال نال خلیاں دے قدرتی نقصان نوں روکدے ہین۔ پروفیسر دا آکھنا ہے کہ ہو سکدا ہے کہ ایہہ کھابے پنڈے دے ودھن یاں ایہنوں چنگا رکھن وچ مدد نہ دیندے ہوون پر ایہہ ٹھکویں گل ہے کہ ایہہ عمر وچ وادھا ضرور کردے ہین۔ حالیں امریکہ، برطانیہ اتے آسٹریلیا وچ ہوون والیاں کھوجاں وچ وی ایہہ گل ساہمنے آئی ہے کہ پولی فینولز دل دیاں روگاں توں بچاؤندے ہین۔
