جیہڑے لوکی اپنا کھانا کاہلی وچ نگلدے ہین تے ڈھڈ بھر کے کھاندے ہین اوہناں وچ موٹاپے دا روگ ہوون دا خطرہ اوہناں لوکاں نالوں تن گنا ودھ جاندا ہے جیہڑے ہولی تے صبر نال کھاندے ہین۔
ایہہ کھوج جاپان دے سائنسداناں نے حالیں ہی کیتی ہے۔ اوساکا یونیورسٹی دے سائنسی کھوجیاں نے 1122 بندیاں اتے 2165 زنانیاں جیہناں دیاں عمراں 30 اتے 69 ورھیاں وچکار سن، نوں آکھیا کہ اوہ اپنے بھار اتے اپنے کھاون پیون دے ویہار نوں جاچن۔
تقریباً ادھے بندیاں اتے ادھیاں ای زنانیاں نےدسیا کہ اوہ ڈھڈھ بھر کے کھاندے ہین۔ ادھے توں کجھ تھوڑے اتے اک تہائی توں کجھ ودھ زنانیاں نے آکھیا کہ اوہ کاہلی وچ کھاندے ہین۔ جیہڑے بندے اتے زنانیاں نے آکھیا سی کہ اوہ ڈھڈھ بھر کے کھاندے ہین اوہناں دا بھار اوہناں نالوں ودھ ہو گیا جیہڑے صبر نال کھاندے سن۔
ایس کھوج دا سٹہ کھوجیاں نے ایہہ کڈھیا کہ کھاون دیاں ایہہ دو عادتاں بندے دے پنڈے نوں موٹا کردیاں ہین۔
