2020 وچ تمباکو پین نال مرن والیاں دی گنتی دونی ہو جاوے گی

عالمی ادارہ صحت دی پیشن گوئی موجب تمباکو پین والیاں دی گنتی 2020 تیکر دونی ہو جاوے گی۔ جدوں کہ امریکہ وچ ہر سال حکومت تے وسیب دے دوجے اداریاں ولوں کیتے جاون والے جتناں دے کارن نوے فیصد تمباکو پین دی ایس لت توں چھٹکارہ پاون دے جتن کردے ہین آغا خان یونیورسٹی ولوں کیتی جاون والی اک سٹڈی موجب پاکستان وچ تمباکو پین والیاں دی گنتی ودھ رہی ہے۔

قومی تے بین الاقوامی ستھاں دے دبا دے تت وچ سیگرٹ دے پیکٹاں تے لکھی وارننگ دے لفظاں نے کیہہ پاکستان وچ تمباکو پین نال نبڑن وچ کوئی کردار ادا کیتا ہے ؟ حساب کتاب دسدے ہین کہ نہیں۔ آغا خان یونیورسٹی ولوں کیتے جاون والے اک سجرے سروے موجب چالی فیصد پاکستانی مرد تے اٹھ فیصد زنانیاں تمباکو پین گجیاں ہین۔ تے ہرکھ والی گل ایہہ ہے جو ایہدے توں چھٹکارا پاون دی چاہ رکھن والیاں نوں ضروری مدد وی نہیں۔

تمباکو پین دی عادت چھڈنا اینا سوکھا نہیں جنا ظاہر وچ نظر آوندا ہے۔ تمباکو پینا چھڈن دی کوشش کرن والے ایس گل نوں چنگی طرحاں سمجھدے ہین۔ اوہ کجھ دیہاڑ کجھ ہفتیاں لئی اہنوں چھڈ دے ہین پھیر اُس پاسے پرت جاندے ہین۔ تمباکو دا کش لاون دے پنج سیکنڈ مگروں ہی نیکوٹین دا اک ریلہ دماغ تیکر اپڑ جاندا ہے۔ نیکوٹین اک بوہت نشے والی شے ہے۔ پر ایتھے امریکہ وچ تمباکو پینا چھڈن والیاں دی مدد لئی کجھ نویاں شیواں ملدیاں ہین۔ مثال دے طور تے بیٹری توں چلن والے اک سموک لیس سگریٹ وچ نیکوٹین تے ہوندی ہے پر تمباکو نہیں۔

پر سموک لیس سگریٹ نوں چھیتی ہی نیکوٹین ویکسین نال مقابلے دا ساہمنا کرنا پوے گا۔ ایہہ ویکسین دماغ راہیں جسم نوں ایہہ دسن توں روکن لئی بنائی گئی ہے کہ نیکوٹین ورتنا ایس لئی سکون دیندا ہے۔ڈاکٹر نینسی ریگوٹی میسا چیوسٹ وچ تمباکو پین دے علاج لئی اک سروس دی ڈائریکٹر ہین۔ اوہناں دا کہنا ہے جو ایہدے نال دماغ تیکر نیکوٹین دی ترسیل بند ہوجاندی ہے تاں جو جدوں کوئی سگریٹ پیوے تے کوئی سواد نہ آوے تے کجھ چر مگروں اوہ اہنوں چھڈ دیوے۔

ڈکٹر ریگوٹی کہندیاں ہین جو لوک آپوں تمباکو پینا نہیں چھڈ سکدے۔ عالمی ادارہ صحت دے گویڑ موجب گھٹو گھٹ پنجاہ لکھ بندے ہر سال تمباکو پین نال مر جاندے ہین۔ جے ایہہ سلسلہ جاری رہیا تے ایہہ گنتی ودھ کے 2020 تیکر اک کروڑ ہو جاوے گی۔ ایس لئی ضروری ہے جو ایہدے کئی طرحاں دے علاج ہین تاں جو لوک سیگرٹ ہمیش لئی چھڈسکن۔