گھٹو گھٹ پنج لکھ آن لائن بینک اکاؤنٹ ،کریڈٹ کارڈ تے ڈیبٹ کارڈ دیاں تفصیلاں اک وائرس راہیں چوری کرلئیاں گئیاں ہین۔ ایس وائرس نوں سائبر کرائم وچ ہن تیکر دا سب توں خطرناک وائرس کہیا جارہیا ہے۔سائنووال ٹروجن ناں دے وائرس نوں آر ایس اے ولوں پھڑیا گیا ہے۔ آر ایس اے فارچیون 500 کمپنیاں دے نیٹ ورک دے بچاون وچ مدد کردی ہے۔
آر ایس اے دا کہنا ہے جو ٹروجن وائرس نے پوری دنیا وچ کمپیوٹراں تے اثر پایا ہے۔ آر ایس اے دے سیکورٹی ڈویژن دے سین بریڈی موجب ایہدا اثر ساری دنیا تے ہویا ہے تے تقریبا دو ہزار ڈومین تے اثر پیا ہے۔ ٹروجن ولوں فروری دو ہزار چھ وچ پتہ لگیا سی۔ ایہدے مگروں مسٹر بریڈی دا کہنا ہے جو امریکہ ، برطانیہ، آسٹریلیا تے پولینڈ دے دو لکھ ستر ہزار توں ودھ بینک اکاؤنٹ تے دو لکھ چالی ہزار کریڈٹ تے ڈیبٹ کارڈ تے اثر ہویا ہے۔
آر ایس اے نے اہنوں انٹرنیٹ کنکشن لئی سب توں خطرناک آکھ دتا ہے۔ اپریل دو ہزار ست وچ گوگل دے کاہڈواں نے پنتالی لکھ ویب صفحیاں دا مطالعہ کرن توں مگروں ایہہ نتیجہ کڈیا کہ اہناں صفحیاں وچوں دس فیصدتے وائرس نال اثر ہویا سی۔
کاہڈواں نے دو ہزار اٹھ وچ کہیا کہ ہر دیہاڑے ایس وائرس نال چھ ہزار نویں صفحیاں تے وی اثر ہویا ہے۔ ایس وائرس توں بچن لئی طریقہ بڑا سوکھا ہے۔ انٹرنیٹ سیکورٹی ولوں کمپنی فورٹینیٹ دے ڈیرک مینکی کہندے نیں جو ویب تے جاون توں مگروں سوچ وچار کے ہی کسے لنک تے کلک کرنا چاہی دا۔
آر ایس اے نے کہیا اوہ ساری دنیا دے بینکاں تے معاشی اداریاں دے نال تعاون کررہیا ہے تے اوہناں سنول وائرس ولوں دس رہیا ہے۔ تے اوہنے ایس وائرس ولوں قنونی ایجنسیاں نوں وی دس دتا ہے۔
