جرمنی دے سائنسداناں نے دوائی دی اک ایہو جہی گولی بنا لئی ہے جیہڑی پنڈے دے اندر جا کے پہلوں پیڑ نوں لبھے گی تے فیر اوہنوں مکاوے گی۔ ایس گولی وچ اک مائکرو پروسیسر، بیٹری، وائرلیس ریڈیو، پمپ اتے دوائی رکھن دی تھاں بنی ہوئی ہے تاں جو ایہہ پیڑ والی تھاں تے دوا نوں پہنچا سکے۔
جرمنی دا فلپس ہسپتال جیہڑا دنیا وچ ہسپتالاں وچ ورتے جاون والے سند بناؤن دا سبھ توں وڈا ہسپتال ہے دا آکھنا ہے کہ ایہہ گولی جیہدا ناں ''آئی پِل'' رکھیا گیا ہے، ایہدے وچ لگے ہوئے سینسر نال تیزابیت نوں مِن دی ہے تے فیر جتھے دوائی دی لوڑ ہووے اوسے تھاں تے دوائی پہنچا دیندی ہے۔
ایہہ گولی معدے دیاں روگاں لئی اچیچا لابھ رکھدی ہے۔ ڈاکٹراں دا آکھنا ہے کہ ایس گولی دی ورتوں نال روگیاں نوں دتی جاون والی دوائی دی مقدار گھٹ جاوے گی کیوں جو پہلوں جیہڑی دوائی ٹیوے لاؤندیاں روگیاں نوں وادھو کھانی پیندی سی اوہ ہن نہیں کھانی پوے گی تے دوائیاں دے سائیڈ افیکٹ وی گھٹ جاون گے۔
ایس توں پہلوں کجھ روگاں نوں لبھن لئی کیمرہ کیپسول ورتے جا رہے ہین پر اوہناں وچ اینی صلاحیت نہیں کہ اوہ دوائی وی پیڑ والی تھاں تے پہنچا سکن۔ پر ایہہ آئی پل پنڈے وچ درجہ حرارت نوں مِن دی ہے تے اوہدی جانکاری وائرلیس تے باہر پئے ہوئے رسیور نوں دیندی ہے۔
