ہندوستانی خلائی ادارے دا کہنا ہے جو اوہدی پہلی خلائی گڈی چند تے لتھ گئی ہے۔ ہندوستانی کاہڈ دے ادارے نے دسیا جو ' مون امپیکٹ پروب ' ناں دی نکی بناء خلانورد چند گڈی اپنے آربٹر توں وکھ ہو کے منصوبے موجب جمعے دے دیہاڑے چند اُتے لتھ گئی۔
ادارے موجب ایہہ سارا کجھ سوہنے طریقے نال ہو گیا۔ عہدے داراں نے دسیا کہ خلائی گڈی دے چند تے لتھن ویلے نیڑیوں لائیاں گئیاں تصویراں وِڈیو کیمرے نال سانبھ لئیاں گئیاں تے چند توں زمین تے ملیاں۔
چند گڈی مٹی دے نمونیاں دا تجزیہ کرے گی تاں جو چندراین ون مہم جوئی دے دوہواں سالاں دے مشن وچ مدد کرسکے۔ جیہدا مقصد چند دی سطح دا مطالعہ کرنا ہے تے ایہہ وی پتہ لاونا ہے جو چند دی سطح دی گہرائی وچ کیہہ راز لُکے ہوئے ہین۔
ایہہ چند گڈی ' چندرائن ون ' نوں چند دے محور تے گھلن دے دو دناں مگروں چند تے لتھی۔ چندرائن ون چند دی سطح توں سو کلومیٹر اُتے چند دے محور دوالے گھم رہی ہے۔ ایس خلائی جہاز نوں ہندوستان دے شہر چنائی دے سریہار کوٹا علاقے توں بائی اکتوبر نوں فضا وچ گھلیا گیا سی۔
ہندوستان اپنے ایشیائی گوانڈھیاں، جاپان، تے چین دے پچھے پچھے چل رہیا ہے، جنہاں نے پہلوں ہی اپنے چند گڈیاں چند دے محور وچ گھل دتیاں ہین۔
ہندوستانی عہدےداراں دا کہنا ہے جو ایس مہم تے گھٹو گھٹ اٹھ کروڑ ڈالر خرچا آیا ہے اوہناں موجب ایہدے توں لبھن والی معلومات اگے ہندوستانی مہماں وچ مدد دیوے گی۔ خلائی ادارے نے کہیا دو ہزار ویہہ تیکر چند تے انسانی مہم گھلن دا ارادہ رکھدا ہے جدوں کہ اوہ مریخ تے اپڑن دا وی چاہوند ہے۔
