پینٹا گون نے اُڈن والی کار بناؤن دا کم شروع کر دتا
وچار ڈیسک
November 15th, 2008
پینٹا گون دے سائنس دے شعبے نے اعلان کیتا ہے کہ اوہ اک ایہو جہی کار بناؤن گے جیہڑی سڑکاں تے دوڑن دے نال نال ہوا وچ وی اُڈے گی۔ ادارے دا آکھنا ہے کہ ایہہ کار فوجی کماں وچ وی ورتی جا سکدی ہے تے ایہدے وچ دو توں چار بندیاں دے بیٹھن دا پربندھ کیتا جا سکدا ہے۔
اُڈن والیاں گڈیاں بناؤن دا وعدہ کئی کمپنیاں دھاکیاں توں کردیاں آ رہیاں ہین۔ اجکل کئی کمپنیاں دا آکھنا ہے کہ اوہ اُڈن والیاں گڈیاں بناؤن دے بہت نیڑے پہنچ گئے ہین۔ ٹیرافوگیا دا دعویٰ ہے کہ پر اکٹھے ہون والا نکا جہیا جہاز ورھے 2009 تیکر بنا لیا جاوے گا۔
پینٹا گون دے سائنسی شعبے ڈرپا دا آکھنا ہے کہ اوہناں دی ایہہ اُڈن والی کار سڑک تے 60 میل فی گھنٹہ دی رفتار نال دوڑے گی تے ہوا وچ 150 میل فی گھنٹے دے حساب نال اُڈے گی۔ اک ٹنکی پیٹرول نال ایہہ دو گھنٹے ہوا وچ اُڈ سکے گی۔ ایجنسی دا آکھنا ہے کہ وڈا مسئلہ ایہدا ڈیزائن ایہو جہیا بناؤنا ہے جیہڑا فوجی کماں وچ وی ورتیا جا سکے اتے عام لوکاں نوں وی وارا کھاندا ہووے، نکا جہیا ہووے اتے بہتا مہنگا نہ ہووے تاں جو ایہدی ورتوں بہتی ہو سکے۔
