شام دے دارالحکومت دمشق دے مارایہ ضلعے دیاں گلیاں وچ سجے سجائے گئے کئی نائٹ کلب موجود نیں۔ ایہہ اوہ تھاں ہے جتھے ملک شام توں ہی نہیں سگوں سعودی عرب تے عراق توں وی کئی لوکی جوان مُٹیاراں نوں نچدیاں ہوئیاں ویکھن لئی آؤندے نیں۔
ایہناں نائٹ کلباں وچ نچن والیاں کڑیاں جوان ہُندیاں ہین تے اوہناں وچوں کئی عراقی مہاجر ہین، ایہہ کُڑیاں مجبور ہوکے اپنا اتے اپنے گھروالیاں دا ڈھڈھ بھرن لئی ایہہ کم کردیاں نیں۔ اہناں نچن والیاں مُٹیاراں دے چار چفیرے سیکیورٹی گارڈ کھلوتے ہوندے نیں تانجے کوئی وی بندہ اوہناں دے نیڑے نہ جاسکے، مگروں اوہی سیکیورٹی گارڈ اوہناں تماشبیناں کول کڑیاں دی دلالی وی کر دے نیں۔
پچھلے چار ورھیاں وچکار لکھاں عراقیاں نے شام تے اردن ول ہجرت کیتی ہے تے اوہناں وچوں کئی ٹبر اجیہے وی ہیں جنہاں دیاں زنانیاں مجبور ہو کے ایہہ کم کردیاں نیں۔ شام دے امدادی ادارے اوہناں زنانیاں دی گنتری دا گویڑ نہیں لا سکے۔ اہناں وچوں کئی زنانیاں دا آکھنا ہے کہ اوہ مجبور ہوکے مرابہ ڈسٹرکٹ ورگے تھاں تے کم کردیاں نیں۔
اپنے وال ''پونی ٹیل'' وچ بنھ کے 14 ورہیاں دی نمانی رفیف وی اوہناں ہی کڑیاں وچوں اک ہے جنہاں نوں گویڑ نہیں کہ جتھے اوہ رہندیاں نیں اوتھے کیس طرحاں دے جوکھم ہُندے نیں۔ اوہدا آکھنا ہے کہ ''میریاں تن بھیناں تے چار بھرا نیں، میریاں ساریاں بھیناں دے ویاہ ہوگئے نیں۔ اوہ بغداد وچ رہندے نیں۔ میں ایتھے اپنی ماں تے نکے بھرا دے نال آئی آں تے میرے گھروالیاں نوں پتہ نہیں کہ میں ایتھے کیہ کر دی آں''۔
رفیف نے دسیا کہ شام وچ پناہ گیراں دے کم کرن تے روک لگی ہوئی ہے تے اوہناں دے کول جیہڑے چار پیسے سی اوہ مُک گئے ہےن تے ہن اوہدی ماں کمائی لئی دوجے ذریعے لبھدی ہے۔ اوہدا آکھنا ہے کہ ''اک زنانی میری ماں دے کول آئی اوہنے میری ماں دے نال کجھ گل باتاں کیتیاں جیہدے توں مگروں میری ماں مینوں اوہدی دسی ہوئی تھاں تے گھلن نوں تیار ہو گئی۔ سانوں پیسیاں دی لوڑ سی۔ مینوں ایس پیشے پاروں اک واری پُلس نے پھڑ کے عراق وی گھل دتا سی پر میں اک جعلی پاسپورٹ بنوا کے پھیر مُڑ آئی آں۔''
اوہدا آکھنا ہے کہ اوہ اک رات وچ 30 ڈالر کما لیندی ہے پر جدوں کوئی تگڑا بندہ اوہنوں اپنے بنگلے وچ لے جاندا ہے تے اوس راتیں اوہ 100 ڈالر وی کما لیندی ہے۔ پر رفیف سانوں ایہہ گل نہیں دسنا چاہندی کہ 100ڈالر کماون لئی اوہنوں کیہ کیہ کرنا پیندا ہے۔
ایہہ کم کرن والیاں ساریاں سیکس ورکرز اپنی مرضی نال ایہہ کم کرن لئی تیار نہیں ہُندیاں۔ 16 ورہیاں دی ندا دے مطابق اوہدے پیو نے اوہنوں عراق تے شام دی سرحد تے کلیاں چھڈ دتا سی کیونجے ندا دے اک کزن نے اوہدی عزت لُٹی سی۔ پنج عراقی بندے اوہنوں سرحد توں دمشق لے آئے جتھے اوہناں ساریاں نے اوہدے نال زنا کیتا تے مگروں اوہنوں اک بھیڑی زنانی ہتھ ویچیا گیا، مگروں اوس زنانی نے ندا نوں نجی بنگلیاں وچ جاون تے نائٹ کلباں وچ نچن لئی مجبور کیتا۔ ہن ندا اک حکومتی سیکیورٹی مرکز راہیں عراق پرتن دی اُڈیک کر رہی ہے۔
شام دی حکومت دا آکھنا ہے کہ پُلس نے نائٹ کلباں وچ طوائف دے طور تے کم کرن والیاں اوہناں عراقی کُڑیاں نوں وی پھڑیا ہے جنہاں دی عمر صرف باراں سال ہے۔ اقوام متحدہ دے پناہ گیراں دے اک ادارے نال واسطہ رکھن والی لارنز جولیس دے مطابق ''سانوں کئی زنانیاں دے بارے پتہ لگا ہے جیہڑیاں مجبور ہو کے اپنے آپ نوں ویچن لئی تیار ہوجاندیاں نیں۔''
اوہناں نے ایہہ وی آکھیا ہے کہ ''شرم تے ڈر اوہ کارن ہین جنہاں دا کر کے حکومت تے امدادی ادارے شام وچ ''جسم فروشی'' دے دھندھے وچ رلتی بندیاں دی اصل گنتری دا پتہ لاون وچ ناکام ہوگئے نیں۔'' لارنز جولیس دے مطابق ''جدوں اسیں اوہناں کُڑیاں تیکر اپڑدے ہاں یاں کدی ایس توں پہلاں وی اوہی لوکی اوہناں نوں ضمانت تے چھڈاؤندے نیں، اوہی بندے اوہناں نوں ''جسم فروشی'' دے پیشے وچ لیاون دے ذمہ دار نیں۔''
عراق توں ہجرت کرن والیاں کئی جوان زنانیاں دے ذہن وچ اک سوکھی حیاتی دا نقشہ ہُندا ہے پر اجیہے حالات وچ اوہناں نوں پتہ لگدا ہے کہ شام وچ جیون کنا اوکھا ہے۔ حیاتی دے ایس حصے وچ جتھے جیون وچ نویں راہ لبھن دا ویلا ہوندا ہے ندا ورگیاں کڑیاں دے وچاراں وچ ''اوہ اک بند گلی وچ اپڑ گیاں نیں''۔ ندا دا آکھنا ہے کہ ''ہن اوہ مینوں عراق واپس گھل دین گے۔ اوتھے میرا کوئی وی نہیں تے عراق وچ مینوں اپنی جان دا خطرہ ہے۔ ایتھوں عراق جا کے میری کوئی وی آس باقی نہیں رہوے گی، میں حکومت نوں وی دسیا ہے کہ میں عراق نہیں جانا چاہندی۔ میرے گھروالیاں نے مینوں سرحد تے کلیاں چھڈ دتا سی''۔
