زنانیاں دی ریکارڈ گنتی ایس واری لوک سبھا چوناں وچ جتی
وچار ڈیسک
May 26th, 2009
اجوکیاں بھارتی چوناں وچ لوک سبھا دیاں 59 سیٹاں زنانیاں نے جتیاں ہین جیہڑی ہن تیکر بھارتی سیاسی تاریخ دی سب توں ودھ گنتی ہے۔
ہندوستانی اخبار 'انڈین ایکسپریس' موجب اجوکیاں چوناں وچ 543 کل ممبراں وچوں زنانی ممبراں 59 ہو گئیاں ہین۔ ایس توں پہلاں کدی وی لوک سبھا وچ زنانیاں دی گنتی 50 توں نہیں ودھی سی۔
13 ویں لوک سبھا وچ زنانی ممبراں دی گنتی 49 سی۔ ہندوستان دی لوک سبھا وچ زنانی ممبراں دی در کدے وی 10 فیصد توں نہیں ودھی۔ 1999ء وچ ایہہ در 9.02 فیصدی سی جدوں کہ پہلی لوک سبھا وچ ایہہ در 4.4 فیصدی سی تے سب توں گھٹ در دے لحاظ نال چھیویں لوک سبھا 1977 وچ سی۔
بی جے پی دیاں زنانی ممبراں سب توں ودھ نیں جیہناں دی گنتی 13 ہے۔ اُتر پردیش توں سب توں ودھ 13 زنانیاں تے دوجے نمبر تے لہندے بنگال وچوں 7 زنانیاں چون ہو کے لوک سبھا وچ آئیاں ہین۔
