ڈیرہ غازی خان: پنچایت نے جمن توں پہلوں ہی 2 کڑیاں ونی کر دتیاں
وچار ڈیسک
June 4th, 2009
کالا کالی دے جھیڑے تے ہوون والے قتل دا پنچایتی فیصلہ کردیاں ہوئیاں جمن توں پہلوں ہی دو کڑیاں ونی کر دتیاں گئیاں جدوں کہ کالی تے ڈھالی سال دی کڑی نوں ونی کردیاں ہوئیاں مقتول ٹبر وچ نکاح کروا دتا گیا مستقبل وچ جمن والیاں کڑیاں دا ساک نہ دیون تے جرمانہ دیونا ہووے گا۔
تفصیلاں موجب اک سال پہلوں قبائلی علاقے وچ واہے خان دی بھین عائشہ نوں علاقے دے اک بندے فاروق خان نال کالی کر دتا گیا سی جیہدے تے کالا فاروق خان نوں علاقہ بدر نہ ہوون تے واہے خان نے گولی مار کے قتل کر دتا سی تے نسیا ہویا سی۔ بی ایم پی موجب مقدمے توں مگروں ملزم اک سال تیکر لکیا رہیا۔
پچھلے دناں وچ واہے خان دی درخواست تے جھیڑے دے حل لئی تمن کھوسہ وچ اک پنچائت سدی گئی جیہدے وچ علاقے دے شریفاں سنے کئی بندے شریک ہوئے ایس موقعے تے فیصلہ کیتا گیا پئی کالی عائشہ بی بی دا ویاہ مقتول فاروق خان دے بھرا دے نال جدوں کہ قاتل واہے خان دی ڈھائی سال دی دھی دا نکاح مقتول فاروق دے پتر قاسم دے نال کر دتا جاوے۔ انج واہے خان دی مستقبل وچ جمن والیاں دو کڑیاں وچ فاروق دے خاندان نوں دتیاں جاون گئیاں۔ جے کڑیاں نہ جمیاں یاں واہے خان نے اوہناں نوں ونی کرن توں انکار کیتا تے پنجاہ لکھ جرمانہ ہووے گا۔
پنچائتی فیصلے توں مگروں عائشہ بی بی دا نکاح رشید نال کر کے اوہنوں کھسم دی سپردے کر دتا گیا۔ جدوں کہ ڈھائی سال دی کڑی دا نکاح قاسم دے نال کر دتا گیا ہے پر اوہدا ٹور ٹراوا حالی ہوونا ہے۔ مقتول دے وارث اگلے ہفتے عدالت وچ پیش ہو کے ملزم واہے خان دی بریت لئی راضی ناویں دے بیان ریکارڈ کراون گے۔رابطہ کرن تے کمانڈنٹ بارڈر ملٹری پولیس طارق محمود بخاری نے واپر توں جانکاری نہ ہوون دا وکھالا کیتا پر اوہناں نے پک کروایا پئی ایس سلسلے وچ پوری پن چھان کیتی جاوے گی تے جے پنچایتی واقعہ ٹھیک ہویا تے قنون موجب کاروائی کیتی جاوے گی۔
