ہندوستان وچ کسبیاں نے اپنے بچاء لئی کراٹے سکھنا شروع کر دتے

ہندوستان دی ریاست تامل ناڈو وچ دھندہ کرن والیاں کسبیاں نے دلیاں تے بھیڑا ورتاء کرن والے گاہکاں توں بچن لئی کراٹے سکھنا شروع کر دتے ہین۔ کسبیاں دا آکھنا ہے پئی اوہ آئے دن دی مار توں اک گئیاں ہین ایس لئی اوہناں نے اک مقامی سماجی ستھ نال رابطہ کیتا ہے۔

کراٹے کلاس دے پربندھیاں نوں آس ہے پئی اپنے بچاء دے ایس قدیمی طریقے نال لوکاں نوں ایہہ سنیہا جاوے گا پئی دھندہ کرن والیاں نال مارا ماری بند ہونی چاہیدی ہے۔ اک گویڑ موجب ہندوستان وچ 30 لکھ دھندہ کرن والیاں ہین۔

ایہہ زنانیاں روز 5 گھنٹے کراٹے سکھدیاں ہین تے ہن ایہناں نوں پک ہے پئی کسے وی بھیڑے ویلے ایہہ کسے نال وی چنگی طرحاں نبڑ سکدیاں نیں۔ جے کسے نوں مار نہ سکن تے اینے جوگیاں تے ہو ای گئیاں ہین پئی اوتھوں بچ کے نس جان۔

کسبیاں نوں کراٹے دی سکھلائی اک سماج سیوا کرن والی ستھ دے رہی ہے جیہدے موڈھی سیکریٹری اے جے ہری ہرن نے دسیا پئی اکلے تامل ناڈو وچ 90 ہزار کسبیاں ہین۔ ایہناں وچون بہتیاں نوں روز مار جھلنی پیندی ہے جیہڑی اکلے گاہکاں ولوں ای نہیں سگوں مقامی ٹھگاں تے پولیس والیاں کولوں وی پیندی ہے۔

ایہہ لوک ایہناں کسبیاں تے حملے کردے ہین اوہناں دے پیسے کھوہ لیندے ہین تے اوہناں نوں سیکس کرن لئی آکھدے ہین۔ اسیں چاہندے ہاں پئی اوہناں نوں اینے جوگا کر دیئے پئی اوہ اپنی راکھی کرن جوگیاں ہو جان۔ ہری ہرن نے دسیا پئی دوجے مرحلے وچ اوہ 300 کسبیاں نوں کراٹے دی سکھلائی دین گے تے اوس توں مگروں 500 نوں۔ اوہناں آکھیا پئی اسیں ایہو جہے لوکاں نوں ایہہ سنیہا دینا چاہوندے آں پئی ہن اوہناں دا زور دھگانہ نہیں چلے گا۔