میں سیاست بارے بوہتا نہیں جاندی پر جیکر تُسیں مینوں زنانیاں ولوں حکومت سانبھن بارے پُچھو تے میں اوہدی مذہبی نرپکھی اُتے زور دیواں گی جیویں مذہبی نرپکھ (مرد یاں سوانی) ملک دا مُکھی بن جاندا ہے تاں ایہہ ملک دی بھلیائی واسطے چنگی گل ہے۔ ایتھے کوئی جنس اہمیت نہیں رکھدی جیکر کوئی کٹر وادی عورت حکمرانی حاصل کرلوے تے ملک دی مُکھی بن جاوے تے میں ایہو کہواں گی کہ مذہب نرپکھ مرد کول حکومت ہووے۔ پر اصل وچ میں ایہہ چاہواں گی کہ مذہبی نرپکھ زنانی کسے مسلمان ملک دی واگ دوڑ سنبھالدی ہووے تے سارا قانون برابری تے ہووے یعنی ہر کسے لئی اکو جیہا۔
اسیں قانون راہیں برابری پیدا کر سکدے ہاں، چاہے کوئی مسلم، ہندو یاں عیسائی ملک ہووے۔ تُرکی وچ اوہناں نے برابری دا ماحول سرجیا ہے۔ پر سعودی عرب وچ اجیہا ماحول نہیں۔ ایہہ سیاسی آگواں دی مرضی تے ہے کہ اوہ کیہڑا قانون چاہندے ہین مذہبی قانون یاں سیکولر قانون ۔ مسلماناں دی سنگھنی وسوں والے مُلکاں وچ اسیں ویکھیا اے کہ اوتھے زنانیاں حکومت تے قابض نہیں سن، پر ہُن ویلا ہور ہے۔ زنانیاں نوں حکومت وچ ویکھ کے حیرانی ہندی ہے۔ بنگلہ دیش دی اک زنانی یعنی وزیراعظم لمے ویلے توں اوس ملک دی واگ دور سانبھی بیٹھی ہے۔اوتھے ہی اک ہور زنانی لمے چر توں مخالف دھر دی آگو ہے ایہہ سبھ کجھ اک مسلم سنگھنی وسوں والے ملک وچ ہی ممکن ہے۔ مسلمان وسوں والے ہورناں ملکاں وچ ایس بارے سوچیا نہیں جا سکدا۔ کئی لہندے دے ملک سوچ ہی نہیں سکدے کہ زنانی دا کار چلاؤنا غیر قانونی ہے۔الجیریا وچ کئی مسلمان وزیر ہین تے تُرکی وچ حالت تھوڑی چنگی ہے۔ میں ایہہ وی سوچدی ہاں کہ جیکر مسلم وسوں والے ملکاں وچ زنانیاں نوں ودھ توں ودھ حق ملن تے ایہہ ملک دی بھلیائی واسطے چنگی گل ہے۔ ایہہ ملک وی مذہبی نرپکھتا دا قانون بنا سکدے ہین، جیہڑا زنانیاں لئی چنگا ہے۔ زنانی دبی کُچڑی ہے کیونجے مذہبی رواج، ریتاں تے رہتل بہتل ایہدی ذمے وار ہے۔ میں ایہہ کہنا چاہندی آں کہ ساریاں زنانیاں زنانی دے حقاں دی حامی نہیں بھردیاں تے ناہیں سارے مرد ، مرد پکھی ہوندے نیں۔ اسیں ویکھدے آں کہ کئی زنانیاں کٹر وادی ہوندیاں ہین یاں زنانی ورودھی۔
کئی مرد زنانی پکھی ہوندے نیں۔میرا خیال اے بندہ اجیہا ہووے جیہڑی انسانی حقاں وچ یقین رکھدا ہووے، جو زنانیاں دے حقاں بارے یقین رکھدا ہووے تے مذہبی نرپکھ انسانیت اُتے ایمان رکھدا ہووے۔اجیہے بندے نوں مسلم ملک یاں کسے ہور ملک وچ حکومت ملنی چاہیدی ہے۔ایس نال اوہ ملک نوں چنگا بنا دیوے گا۔ جیکر زنانی یاں مرد ایہناں گلاں تے یقین رکھدا ہے تاں اوس ملک وچ زنانیاں دی حالت چنگی ہووے گی۔ حکومت وچ اجیہیاں کجھ زنانیاں ہن، جیہناں نے زنانیاں لئی کجھ نہیں کیتا۔
اوہ مرد پکھی بندیاں وانگ وچردیاں ہین ۔اسیں جاندے ہاں کہ بھارت وچ زنانیاں نوں کیویں حکومت لبھدی ہے کیونجے اوہناں دا پیو، بھرا یاں کوئی ٹبردا بندہ سیاست دا حصہ ہُندا ہے۔ زنانیاں دی پہنچ سیاست اتے تعلیم تک ہونی چاہیدی ہے۔ جیکر زنانیاں دلوں سیاست دا حصہ بننا چاہندیاں ہن تے اوہ اپنے بل بوتے تے خاندان پاروں آگو بندیاں ہن تاں میں بوہتی خوش ہوواں گی۔ گھٹو گھٹ میں اجیہے لوکاں نوں پسند نہیں کردی ناہیں اوہناں نال رضامند ہُندی آں جیہڑے حکومت وچ آؤن لئی مذہب دی ورتوں کردے ہین۔
