سعودی عرب دے شاہ عبداللہ نے زنابالجبر دی شکار ہوون والی عورت دی معافی دا اعلان کیتا ہے۔ایس عورت نوں قید تے دو سوکوڑیاں دی سزا سنائی گئی سی کیوں جو اوہ اک مرد دے نال کلی سی۔ایس واقعے وچ مرد نال وی جنسی زیادتی ہوئی سی۔
ایس عورت دا کیس'قاطف کیس' دے ناں توں دُھمیا سی۔قاطف کیس تے بین الاقوامی پدھر تے بحث ہوئی تے سعودی عرب دے عدالتی نظام تے بڑی تنقید کیتی گئی۔ایہہ زنانی اک مرد دے نال گڈی وچ سوار سی جدوں اوہناں نوں اغوا کیتا گیا تے جنسی زیادتی ہوئی۔اوہناں دوہواں نوںنو ںسال قید دی سزا بولی ۔
میڈیا موجب شاہ عبداللہ دی معافی توں ایہہ نہ سمجھیا جاوے کہ عدالت دی سنائی ہوئی سزا غلط سی۔جزیرہ اخبار نے وزیر انصاف عبداللہ الشیخ دے حوالے نال لکھیا ہے کہ شاہ عبداللہ عوام دیاں خواہشاں نوں ویکھدیاں ہوئیاں معافی دیون دا حق رکھدے ہین۔چیتے رہوے کہ سعودی عرب وچ زنانیاں دا نیڑے دے ساکاں توں وکھ مرداں نال میل جول تے روک ہے۔قید تے دو سو کوڑیاں دی سزا ایس عورت نوں اوس ویلے سنائی گئی جدوں اوہنے نوے کوڑیاں دی حکم دے خلاف اپیل کیتی۔
سعودی شاہ کئی وار وڈی عیداُتے قیدیاں دی معافی دا اعلان کردے ہین تے ایہہ اعلان ملک دی سرکاری خبراں اپڑاون والی ایجنسی راہیں کیتا جاندا ہے۔بی بی سی دی حبا صالح نے آکھیا کہ عورت دی معافی نوں کئی تبصرے کرن والیاں نے تنقید دا نشانہ بنایا ہے۔اوہناں داکہنا ہے کہ مغرب نوں خش کرن لئی اسلام دے خلاف معافی دتی گئی ہے۔امریکی حکومت نے زنانی نوں دتی گئی سزا نوں حیرانی والی آکھیا پر سعودی عدالتی نظام تے تنقید نہیں کیتی۔
انسانی حقاں دیاں تنظیماں نے شاہ عبداللہ توں عورت نوں معاف کرن دی درخواست دتی سی۔وزارت انصاف نے باہرلے دبا نوں غلط آکھیا ہے تے زور دتا ہے کہ سزا ٹھیک سی کیوں جو زنانی نے مرد دے نال یارانے نوں منیا ہے۔
ایس توں پہلاں ایس زنانی نے آکھیا کہ اوہ ایس مرد دے نال دوہواں دی کھچی ہوئی تصویر واپس لین گئی سی۔اوہنے ہور آکھیا کہ دو مرد گڈی وچ بیٹھے تے اک وکھری تھاں تے لے گئے جتھے اہناں دوہواں دے نال زنا بالجبر کیتا گیا۔ایس عورت دے نال مرد نوں نوے کوڑیاں دی سزا دتی گئی سی پر ایہہ نہیں پتہ اوس دی سزا وی معاف ہوئی ہے یاں نہیں۔
