کینیڈا وچ پردہ کرن توں انکار کرن والی اک مسلمان کُڑی دے اپنے پیو دے ہتھوں قتل تے اسلامی قدراں تے اک بحث چھڑ گئی ہے۔اطلاعواںموجب سولاں ورہیاں دی اقصیٰ پرویز نوں کینیڈا دے علاقے مِسی ساگا وچ اوہناں دے پیو محمد پرویز نے کجھ دیہاڑ پہلاں گل گھٹ کے مار دتا سی۔آکھیا جا رہیا ہے کہ اقصیٰ تے اوہناں دے پیو وچکار کئی مہینیاں توں پردہ نہ کرن دے مسئلے تے پھڈا ہو رہیا سی۔
پُلس نے محمد پرویز نوں قتل دے الزام وچ پھڑ لیا ہے جدوں کہ اقصیٰ دے بھرا وقاص پرویز وی تفتیش وچ رکاوٹ پاون دے الزام ہیٹھ پھڑے گئے ہین۔اقصیٰ دیاں اخیرلیاں رسماں پندراں دسمبر نوں ادا کیتیاں گیأاں،جیس وچ رلت لئی وڈی گنتی وچ اوہناں دے سکول دے پڑھیار کُڑیاں منڈے تے علاقے دے لوک کٹھے سن پر اقصیٰ دے والی وارثاں نے اخیرلے ویلے دفن کرن دی تھاں بدل دتی۔
اقصیٰ دے سکول وچ اوہناں دی تصویر دے نال ہرکھ دے سُنیہاواں لئی کتاب رکھ دتی گئی ہے،جتھے اوہناںنوں جانن والے یاں ایس توں دکھی ہوون والے علاقے دے لوک پھل رکھ رہے ہین۔
عزت تے اقدار دے ناں تے ہوون والے ایس قتل دا ایہہ واقعہ کینیڈا دیاں اخباراں وچ بوہت عام ہے تے اسلام دے حوالے نال پردہ،غیرت دے ناں تے قتل تے زنانیاں تے تشدد ورگے موضوعاں تے بحث ہو رہی ہے۔
انٹرنیٹ دیاں کئی ویب سائٹاں تے ایس واقعے توں مگروں اہناں موضوعاں تے بحث ہو رہی ہے۔سوشل نیٹ ورکنگ ویب سائٹ' فیس بک' تے ایس موضوع تے گیاراں گروپ تے اوہناں دے پنج ہزار توں بوہتے رکن سامنے آچکے ہین۔یو ٹیوب تے اقصیٰ دی ہتیا تے ایس تے ردعمل دے حوالے نال کئی ویڈیو ویکھیاں جاسکدیاں ہین۔
کینیڈا وچ مسلمان مذہبی آگو کوشش کر رہے ہین کہ ایس اثرنوں مُکایا جاوے کہ غیرت دے ناں تے ہوون والے مارا ماردا اسلام نال کوئی تعلق ہے۔کینیڈین مذہبی سکالر ڈاکٹر اقبال ندوی دا آکھنا ہے کہ ماپے خورے نموشی محسوس کردے ہین جے اوہناں دے نیانے اسلامی تعلیمات تے پردے دی پابندی نہ کرن۔
اوہناں موجب ایہہ ماپیاں دی ذمے واری ہے کہ اوہ اپنے نیانیاں نوں اہناں اسلامی قدراں بارے دسن۔' پر مسلمان قتل دی بھرویں مخالفت کردے ہین'۔کینیڈا دی مسلم کمیونٹی وچ انسانی حقاں تے کم کرن والی اک زنانی دا آکھنا ہے کہ اوہناں نوں پک ہے کہ اقصیٰ دے قتل پچھے پردے دا مسئلہ ہی سی۔' پر ایہہ اک پھڈے والا مسئلہ ہے کہ آیا پردہ اسلام وچ لازمی ہے یاں نہیں'۔
زنانی سماجی کارکن،جیہڑی کہ آپوں پردہ کردی ہے،دا کہنا ہے کہ پردہ یاں مذہب اصلی مسئلہ نہیں ہے سگوں توجہ دین والی گل زنانیاں دے خلاف گھراں وچ ہوون والا تشدد ہے۔
