بھاویں صوبہ سرحد دے لڑائی جھیڑے والے ضلعے سوات وچ اک پاسے عسکریت پسنداں نے پھڈا پایا ہویا ہے تے کُڑیاں دے سکولاں تے اداریاں نوں نشانہ بنایا جا رہیا ہے تے دوجے پاسے خورے ملک دی تاریخ وچ پہلی واری ایسے ضلعے توں دو زنانیاں امیدوار عام سیٹ تے الیکشن وچ حصہ لے رہیاں ہین۔
سوات دا حلقہ این اے 29 توں ایس ویلے کئی سیاسی جماعتاں دے اٹھ امیدوار اک دوجے دے مقابلے وچ ہین۔پر ایس حلقے دی اُچیچی گل دو زنانیاں امیدواراں مریم بی بی تے رضوانہ لطیف دا الیکشن وچ حصہ لینا ہے۔
ایس سیٹ تے حصہ لین والی اُنتالی سالاں دی مریم بی بی متحدہ قومی موومنٹ یاں ایم کیو ایم دے ٹکٹ تے الیکشن وچ امیدوار ہین۔مریم بی بی دا تعلق سوات نال ہے جدوں کہ آزاد حیثیت وچ چوناں وچ رلتی رضوانہ لطیف پنجاب توں ہین پر پچھلے کئی ورہیاں توں سوات وچ وسنیک ہین۔
بی بی سی نال گل کردیاں ہوئیاں مریم بی بی دا آکھنا سی کہ اوہناں نے الیکشن وچ حصہ لین دا فیصلہ سوات وچ جاری پاڑ تے پھڈے نوں امن نال حل کروان لئی کیتا ہے۔اوہناں موجب اوہناں نے پہلاں وی اک سوشل ورکر دی حیثیت نال لوکاں دی خدمت کیتی ہے تے اگے وی کرن گئیاں۔
اک سوال دے جواب وچ مریم بی بی دا آکھنا سی کہ مینوں پتہ ہے کہ سوات وچ مذہبی لوکاں دا بوہتا اثر ہے تے زنانیاں لئی ایتھے الیکشن وچ حصہ لینا خطرے توں گھٹ نہیں پر میں اپنی چوناں دی مہم علاقے دیاں ریتاں تے ثقافت نوں ویکھ کے چلاواں گی۔'
سوات وچ سکیورٹی فورسز ولوں عسکریت پسنداں دے ٹھکانیاں تے رات دے ویلے وی گولے باری جاری ہے۔ایس توں وکھ علاقے وچ حالی تیکر خوف دا ماحول ہے تے پھڈے والے علاقیاں توں نقل مکانی کرن والے لوک وی حالی تیکر اپنے گھراں نوں نہیں مُڑے ہین۔حکومت دا دعوی ہے کہ الیکشن توں پہلاں علاقے وچ حالات ٹھیک ہو جاون گے۔
تجزیہ کاراں موجب ایس پاڑ دی صورتحال وچ سوات وچ پرامن الیکشن کروانا حکومت لئی اک چیلنج توں گھٹ نہیں۔
