ریاست بہار وچ پنڈاں تھاواں دیاں زنانیاںنے خبراں دا اک پروگرام شروع کیتا ہے جیہڑا پندراں دناں وچ اک وار ٹی وی تے وکھایا جاندا ہے۔ 'اپن سماچار' یعنی ساڈیاں خبراں ناں دے ایس پروگرام نوں ایس مہینے دسمبر وچ ہی پہلی وار ٹی وی تے وکھایا گیا سی تے اودوں توں ہی ایہہ مظفر پور دے ضلعے دے اک درجن توں بوہتے پنڈاں وچ واہوا مشہور ہو رہیا ہے۔
چینل دے پروگرام گنڈکھ ندی دے کنڈھے رام لیلا گاچی پنڈ دے اک ہنھیرے کمرے وچ کیتے جاندے ہین جیس وچ اک میز، دو کرسیاں تے اک پرانا ٹی وی موجود ہے۔ ایس پروگرام وچ خبراں کدی پروجیکٹر تے کدی کرائے دے ویڈیو پلیئر تے وڈے ٹی وی سیٹ تے ناظرین دے ساہمنے پیش کیتیاں جاندیاں ہین۔
پروگرام جیویں ہی شروع ہندا ہے تے سب خریداری چھڈ کے اوتھے کٹھے ہو جاندے ہین تے فیر شروع ہندیاں ہین آلے دوالے دے علاقے دیاں خبراں۔ کِتے کھاد دی کمی ہے تے کِتے صحت دا کیمپ لگیا ہے۔ اوس دی جانکاری ادھے گھنٹے وچ مل جاندی ہے۔
ایس چینل دی خوبی خورے ایہہ وی ہے کہ فی الحال چینل دا سارا کم کڑیاں کردیاں ہین ''اپن چینل'' دے اسٹاف نوں کسے او بی وین دی وی لوڑ نہیں تے نہ ہی کسے کیبل کنکشن دی۔سائیکل تے چل کے ہی ایہہ شوٹنگ دی تھاں اپڑ جاندیاں ہین تے ہٹ پروجیکٹر لا کے نشریات شروع ہوجاندی ہے۔
ایہہ چینل اصل وچ 'مشن آئی' ناں دی اک غیر سرکاری تنظیم ولوں مقامی لوکاں وچکار علاقائی خبراں نوں لوکائی تیکر اپڑاون پاروں شروع کیتا گیا ہے۔
ایس تنظیم دے اہلکار جئے چندر نے دسیا کہ چینلاں تے اخباراں دی بھیڑ توں مگروں وی مقامی اطلاعواں لوکاں تیکر اپڑ نہیں سکدیاں، ایس لئی چینل شروع کرن دا خیال دماغ وچ آیا۔
مسٹر جئے چندر نے دسیا 'سرکاری اسکیم ہووے یاں کسے تنظیم ولوں لایا جاون والا کیمپ، پنچایت دے عام لوکاں تیکر ایہہ اطلاع نہیں اپڑ سکدی سی کہ ساڈی کوشش ہے کہ ہن مقامی اطلاعواں لوکاں تیکر بناء پیسہ خرچ کیتے اپڑے۔'
جئے چندر دے آکھن موجب 'ساڈے کول کیمرہ تے پہلوں توں سی بس اک پروجیکٹر دا پربندھ کیتا تے مقامی کڑیاں دی مدد نال ایہہ کم شروع کردتا۔'
جئے چندر آکھدے ہین کہ کڑیاں دا چون ایس لئی کیتا کہ اوہناں نال گل بات کرن وچ کوئی جھک دا نہیں تے ایس نال زنانیاں نوں موہری بناون دی مہم وچ وی مدد ملے گی۔
'اپن چینل' دی ٹیم وچ رلتی انیتا کماری دا آکھنا ہے کہ ''مشن آئی'' دے اہلکار سنتوش جی نے سانوں جیہڑی سکھلائی دتی ہے اوس دے مطابق اسیں مقامی مسئلیاں مثال دے طور تے بجلی دی تھوڑ تے اسکول وچ استانیاں دی تھوڑ وغیرہ دے بارے خبراں وکھاؤندے ہاں۔
سنتوش نارنگ نے دسیا کہ حالی ایس چینل راہیں جمعرات تے اتوار دے دن خبراں وکھائیاں جا رہیاں ہین پر ایس دی مشہوری نوں ویکھ کے اہنوں کھلارن دا پروگرام بنایا جاوے گا۔
