ہندوستان وچ زنانیاں تے بالاں دی بھلیائی دی وزیر رینوکا چودھری نے ملک وچ موجود رنڈیاں لئی امدادی منصوبے دا مہاندرا جاری کیتا ہے۔ سرکاری حساب کتاب موجب ہندوستان وچ ایس ویلے تن کروڑ تریہہ لکھ رنڈیاں موجود ہین جنہاں وچ بوہتیاں دی عمر پنجاہ ورہیاں توں گھٹ ہے۔
رینوکا چودھری دا آکھنا ہے کہ اہناں رنڈیاں دی بحالی لئی سب توں وڈا کم ایہہ ہووے گا کہ اوہناں دا فیر ویاہ کروایا جاوے۔ اوہناں دا آکھنا سی کہ اوہ چاہندیاں ہین کہ ایہہ رنڈیاں غربت تے قابو پاون، چنگی حیاتی لنگھاؤن تے جے چاہن تے فیر ویاہ وی کرن۔
وزیر دا آکھنا سی کہ اہناں رنڈیاں نوں فنی سکھلائی دلوان دی لوڑ ہے تاں جو اوہ اپنا خرچہ آپ چُک سکن 'تے فیر سانوں ایہہ ویکھنا ہووے گا کہ اسیں کنج ایہو جہے سدھار شروع کر سکدے ہین جتھے ایہہ زنانیاں ویاہ دی سک رکھن والے مُنڈیاں نال مل سکن'۔
رینوکا چودھری نے آکھیا کہ 'اسیں ہمیش رنڈیاں دی مدد دی گل کرنے آں۔ پر اصل وچ ایس حوالے نال بوہت گھٹ کم ہویا ہے تے ایہو وجہ ہے کہ اج دے زمانے وچ اینیاں ساریاں رنڈیاں آپنے آپ نوں متھرا تے ورندون ورگے مذہبی شہراں وچ لاچار تے مجبور سمجھدیاں ہین'۔
ہندوواں وچ ریت موجب رنڈی دے ویاہ نوں بھیڑا وچاریا جاندا ہے تے ایہہ گل وی عام ہے کہ اوہناں دا سماجی تے معاشی مرتبہ گھٹا دتا جاندا ہے۔
ہندوستان وچ اہناں رنڈیاں دے ٹبر اوہناں دا ساتھ چھڈ دیندے ہین تے اوہناں نوں مذہبی تھاواں تے رہن تے مجبور کردتا جاندا ہے تے اوہ اپنا ڈھڈ بھرن لئی منگن پنن تے مجبورہو جاندیاں ہیں۔
