ممبئی وچ نویں سال دا جشن منا کے مُڑن والیاں دوہواں کُڑیاں دے نال منڈیاں دے اک جتھے ولوں بھیڑیاں حرکتاں کرن دا معاملہ ساہمنے آؤن توں مگروں بدھ نوں ایس واردات وچ رلتی بندیاں دے خلاف ایف آئی آر درج کیتی ہے۔
جوہو تھانے دے سب انسپکٹر سندیپ چوہان موجب زنانیاں دے نال بھیڑیاں حرکتاں، جنسی زیادتی تے استحصال دیاں دفعاں ہیٹھ ایہہ کیس ان پچھاتے بندیاں دے خلاف درج کیتا گیا ہے کیوں جے پُلس حالی تیکر ملزماں دی پچھان نہیں کر سکی ہے۔ ایہہ واقعہ پہلی جنوری دی سویر ڈیڈھ وجے دا ہے پر بدھ دی شام تیکر پُلس نے ایس سلسلے وچ کسے دے خلاف کیس درج نہیں کیتا سی۔
پر جدوں میڈیا دے نمائندیاں نے پلس تے کیس درج کرن لئی زور پایا تے پلس کمشنر ڈی این جادھو نے کیس درج کرن دی اوہناں نوں پک کروائی۔ اوتھے موجود فوٹو گرافر ستیش باٹے موجب جدوں کُڑیاں فائیوسٹار ہوٹل توں اپنے سنگیاں نال سویرے ڈیڈھ وجے دے نیڑے نکلیاں تے تریہہ توں چالی دے نیڑے لوکاں دا جتھہ اوہناں دی پچھے ٹر پیا جنہاں نے اوہناں تے آوازاں کسیاں۔ کُڑیاں نے اعتراض کیتا تے اوہ اوہناں تے جھپٹ پئے تے اوہناں دے کپڑے پھاڑ دتے۔
باٹے نے نیڑیوں لنگھدی پُلس وین نوں روکیا تے کُڑیاں نوں جوہو پُلس سٹیشن لیاندا گیا پر پُلس انسپکٹر شیواجی تدلا پورکر نے کسے دے خلاف کوئی کیس درج نہیں کیتا۔
ممبئی وچ ایہہ پہلا واقعہ نہیں ہے۔ پچھلے ورہے وی نویں سال دے موقعے تے ممبئی دے گیٹ وے آف انڈیا تے انج دا ہی واقعہ ہویا سی۔کجھ مُنڈیاں نے اپنے دوست دے نال آئی کُڑی نوں چواں پاسیوں گھیر لیا تے اوس دے نال بھیڑیاں حرکتاں شروع کر دتیاں۔ اوتھے موجود اک اخبار دے فوٹو گرافر نے اوہ فوٹواں کھچ لئیاں سن تے پُلس نے مگروں اپنے طور تے کیس درج کیتا سی۔پُلس اوہناں ملزماں نوں وی پھڑن وچ کامیاب ہو گئی سی۔
ایس سال وی انج دا واقعہ ہوون تے ممبئی وچ تفریح لئی جاون والی کڑیاں تے زنانیاں لئی کم کرن والیاں تنظیماں وچ چنتا کھلر گئی۔ زنانیاں لئی کم کرن والی ستھ ''آواز نسواں'' دی صدر حسینہ خان نے ایس واقعے نوں بوہت شرمناک آکھیا۔
حسینہ موجب 'ایس دی پوری ذمے واری پُلس تے پربندھیاں تے لگدی ہے۔ پُلس شراب پی کے گڈی چلاؤن والیاں دے خلاف مہم چلا رہی ہے پر کیہ اوہ انج دے دے پھڈے بازاں دے خلاف کجھ کر سکدے سن جیہڑے سڑکاں تے ٹرن والیاں کُڑیاں دا جینا حرام کر رہے ہین تے انج دا واقعہ پچھلے ورہے ہو چکیا سی ایس لئی پُلس نوں ہور بوہتی ذمے واری نال اپنی ڈیوٹی نبھاونی چاہی دی سی'۔
سینئر صحافی کلپنا شرما آکھدیاں ہین' ممبئی وچ ملک دیاں ہور ریاستاں دے مقابلے وچ چھیڑ چھاڑ دے واقعے گھٹ ہندے ہین تے کُڑیاں ایتھے آپنے آپ نوں محفوظ سمجھدیاں سن پر ہن ایتھے انج دے واقعیاں وچ وادھا ہو رہیا ہے۔مرین ڈرائیور تے اک کانسٹیبل راہیں کالج دی پڑھیار دی عزت لُٹی تے پچھلے ورہے گیٹ وے آف انڈیا تے نویں سال دا جشن مناون آئی کڑی دے نال انج دیاں بھیڑیاں حرکتاں نے ممبئی نوں شرمندیاں کر دتا ہے'۔
