بینظیر بھٹو دی موت دے بارے وچار کے بڑا ہرکھ ہندا ہے۔ دو دہائیاں توں صحافت وچ رہندیاں ہوئیاں اسیں اوہناں دے سیاسی کیرئیر نوں نیڑے توں ویکھیا تے اوہناں نوں کئی وار نندیا۔
ہن جدوں اوہ ایس دنیا توں ٹر گئی ہے تے ایہہ احساس ہندا ہے کہ اسیں اوہناں دیاں بوہت ساریاں کامیابیاں نوں اُکا اکھوں اوہلے کیتی رکھیا۔
بڑی ہمت والی زنانی سی، تے مستقل مزاجی نال پاکستان ورگے ' میل شووِ نسٹ' وسیب وچ سیاست کردیاں رہیاں۔ اوہناں نے سیاسی کیرئیر دے نال نال اوہ اپنی گھروکی زندگی وی قائم رکھی۔ اُنی سو اٹھاسی وچ ضیاء حکومت دی پوری کوشش سی کہ اوہ چوناں دی تاریخ انج دی رکھے جیہڑے بینظیر دے نیانے دے جمن دے بوہت نیڑے ہووے تاں جو اوہ چوناں دی مہم وچ گھٹ توں گھٹ حصہ لے سکن۔ اوہناں نوں حکومت دے ارادے دا پتہ سی سو کراچی وچ اوہناں دے ڈاکٹر نے فائل وچ نیانے دے جمن دا ویلا نومبر لکھ دتا۔ حکومت نے چوناں دی تاریخ نومبر رکھ دتی بینظیر بھٹو دا پتر ستمبر وچ جمیا تے اوہ چوناں دی مہم وچ پوری طرحاں گئیاں تے دسمبر وچ ملک دی پہلی زنانی وزیر اعظم بن گئیاں۔ اوہناں دی پہلی دھی اوہناں دے دور حکومت وچ جمی۔ دوجی دھی اُس ویلے جمی جدوں اوہناں دی جماعت اپوزیشن وچ سی۔
اُنی سو اٹھاسی وچ حزب اختلاف اسلامی جمہوری اتحاد نے چوناں دی مہم وچ اوہناں دے تے اوہناں دی ماں دے خلاف اک بڑی گندی میڈیا کیمپین چلائی جیس وچ اوہناں دے کردار تے گند سُٹیا گیا تے دوہواں زنانیاں بارے فحاشی دے دعوے کیتے گئے۔ اگے جا کے اوہناں دے ویریاں نے اوہناں دے کردار نوں تے نشانہ بناونا چھڈ دتا پر اوہناں دے خاوند دیاں بے ایمانیاں نوں نشانہ بناونا شروع کر دتا تے ایس بارے بوہت ساریاں افواہواں دھمیاں۔
'اسیں صحافیاں نے اوس ویلے وی بینظیر نوں بڑا نندیا سی جدوں اوہناں نے اپنا سیاسی 'یونیفارم' مقرر کیتا جیس وچ اوہناں دے سر دا چٹا لیڑا اُگھڑواں سی۔ اسیں 'لبرل' بندیاں آکھیا ایہہ مولویاں دے دبا وچ آ گئی ہے جیہڑا کہ اک سیکولر لیڈر لئی ٹھیک نہیں۔ مینوں لگدا ہے کہ اوہناں دا فیصلہ بالکل ٹھیک سی تے ساڈیاں ریتاں موجب۔
میرا خیال ہے کہ بینظیر اک کامیاب ورکنگ وومن سن۔ تے اِکویں صدی دی پاکستانی زنانیاں لئی اوہ اک مثال بنیاں۔ اوکڑاں توں مگروں وی ڈٹیاں رہیاں تے ساڈے سخت میل شوونسٹ وسیب وچ اوہناں نے کدی ہار نہ منی۔
