بھٹو ناں دا آسرا لئے بنا سیاستدان بناں گی: فاطمہ بھٹو
وچار ڈیسک
January 24th, 2008
فاطمہ بھٹو نے آکھیا ہے کہ اوہ بھٹو ناں دا ٹھپہ لوائے بنا ای سیاست وچ اپنی تھاہر بناؤن گیاں۔ اوہناں آکھیا، ''بھٹو سیاست وچ آؤن دا بڑا وڈا مُل تاردے رہے نیں، میں وی بھٹو آں، تے مینوں ایہہ وی پتہ اے کہ ناں پاروں میرے تے کنیاں روکاں لگنیاں نیں ایس لئی وراثتی سیاست سانبھن دی تھاں میں اپنا ناں آپ بناواں گی۔'' اوہناں ایہہ گل اک لکھاری تے تاریخ دان ولیم ڈلریمپل ولوں جے پور ادبی میلے وچ کیتے گئے اک وچار وٹاندرے وچ آکھی۔
اوہناں آکھیا کہ وراثتی سیاست دی مخالفت ہونی چاہی دی ہے کیوں جے ایہہ جمہوریت لئی چنگی نہیں ہے تے اوہناں لوکاں نوں ایہدے خلاف بولنا چاہی دا ہے جیہڑے بندیاں دی تھاں اصولاں نوں جاچدے نیں۔
فاطمہ بھٹو نے آکھیا کہ ہن تیکر سیاست تے معیشت کجھ ٹبراں دے ہتھاں وچ رہی ہے۔ ایہہ ادھی صدی توں ہُندا آ رہیا ہے تے ایسے نے ای پاکستان وچ جمہوریت نوں برباد کیتا ہے۔نویں خون نوں پاکستانی سیاست وچ ودھ چڑھ کے حصہ لینا چاہی دا ہے تے کسے ٹبر دے مُڈھ تے نہ کسے نوں ودھا چڑھا کے پیش کرنا چاہی دا ہے تے نہ کسے دے لت کھچنی چاہی دی ہے۔
اپنی پھپھی بینظیر دے قتل توں مگروں جگت سیاست نوں ویکھدیاں ہوئیاں فاطمہ بھٹو نے آکھیا کہ اپنے ٹبر دی سیاست مگر چلن دے تھاں اوہ چاہندیاں ہین کہ اوہ ہیٹھلی پدھر دے لوکاں لئی کم کرن تے لکھن لکھاؤن۔ اوہناں دا پہلا شعری پراگہ Whispers of the desert اوہناں دے پیو دی یاد وچ پاکستان توں چھپیا سی جیہناں نوں 1996ء وچ بینظیر دے دور وچ قتل کر دتا گیا سی۔
فاطمہ دے کالماں وچ اوہناں دی پھپھی بینظیر تے پاکستان پیپلز پارٹی نوں بھرواں نندن نے اوہناں نوں اک مشہور لکھاری بنا دتا ہے پر اوہ نے بینظیر بھٹو دے قتل نوں وی بھرواں نندیا ہے۔ اوہناں آکھیا کہ اوہ لکھاری بن کے خوش نیں پر کیوں جے اوہ انگریزی وچ لکھدیاں نیں جیہڑے پاکستان وچ بوہتی لوکائی نہیں پڑھ سکدی ایس لئی پاکستانی اخباراں اوہناں دے کالماں دے اُردو تے سندھی اُلتھے چھاپدیاں ہین۔
