پاکستانی مرداں وچ ایہو جہیا کیہ ہے جیہڑا لیہندے دیاں مشہور زنانیاں نوں اینی کھچ پاؤندا ہے کہ اوہ اوہناں مگرو ٹر پیندیاں نیں؟ نویں افواہ مشہور پاپ سنگر برٹنی سپیئرز بارے آئی ہے کہ اوہ مسلمان ہو رہی ہے تے اپنے عاشق عدنان غالب دے نال پاکستان آ رہی ہے۔ اک برطانوی اخبار 'سن' موجب برٹنی اپنے آپ نوں مارن دا ناٹک کر کے تے اسلام قبول کر کے پاکستان آ کے نویں سریوں حیاتی شروع کرنا چاہندی سی۔
35 ورھیاں دا غالب اک فوٹو ایجنسی وچ کم کردا ہے تے بڑا سوہنا گھبرو ہے جیہدے اگے برٹنی دل ہار بیٹھی ہے۔ میڈیا رپوٹاں موجب غالب برمنگھم واسی اک شریف سُنی مسلمان ٹبر چوں ہے جیہڑے ایس گل تے اینے پریشان ہین کہ اوہناں نے غالب نوں گھروں کڈھ دتا ہویا ہے۔ غالب دے اک سجن نے دسیا ہے کہ غالب دے پیو نے ایس ہفتے اوہنوں آکھیا سی کہ برٹنی نوں چھڈ دے یاں فیر میرے لئی توں مر گیا، پر عدنان نے اوہدی گل نہ گولی۔
ایس توں پہلوں ارباں پتی ٹبر دی جمائما خان نے اپنے گھر والیاں دی مرضی دے خلاف پاکستانی عمران خان نال ویاہ کیتا سی جیہڑا بوہتی دیر نہ چلیا۔ فیر شہزادی ڈیانا دا ڈاکٹر حسنات نال معاشقہ چلیا جیہڑا پاکستانی سی۔ ہن ایس خبر مگروں کہ ڈاکٹر حسنات ایس معاشقے بارے چُپ توڑ رہیا ہے، برٹنی دا معاملے تے گھرو گھری گل چل رہی ہے۔
