آس ہے کہ ترکی دی پارلیمنٹ ہفتے نوں آئین وچ ترمیم کر کے یونیورسٹیاں وچ زنانیاں دے پردہ کرن تے لگی روک وچ نرمی کرے گی۔ ایس ترمیم ہیٹھ یونیورسٹیاں وچ بس روایتی سکارف پاون دی اجازت ہو جاوے گی جنہوں سر تے لے کے ٹھوڈی تیکر ڈھلا جہیا پاؤنا ہووے گا۔ اوہ سکارف جیس نال دھون لُک جاوے اوہ ہن وی نہیں لین دتا جاوے گا تے برقع یاں چادر پاؤن تے روک رہوے گی۔
ایس مسئلے تے ترکی وچ بوہت پاڑ ہے جتھے ریاست سیکیولر ہے۔ پردے دے مسئلے تے پچھلے دناں وچ بوہت روس دا وکھالا ہویا ہے تے ڈر ہے کہ آؤن والے دناں وچ روس وکھالا ودھ سکدا ہے۔
حکومت دا آکھنا ہے کہ سیکیولرازم دا ایہہ مطلب نہیں ہوونا چاہی دا کہ کئی کڑیاں (جیہڑیاں حجاب پاؤنا چاہندیاں ہین پر یونیورسٹیاں وچ حجاب پاون تے روک دے کارن اوتھے نہیں جا سکدیاں) تعلیم توں وانجیاں رہن۔
پر سیکیولر ادارے، فوج تے سوجھوان سمجھدے ہین کہ حجاب پاؤن نال ایہہ ہووے گا کہ عام زندگی وچ وی اسلام دے اثر بوہتے ہوونا شروع ہوجاون گے۔
اپوزیشن دیاں جماعتاں نے وعدہ کیتا ہے کہ اوہ اہناں آئینی بدلیاں نوں آئینی عدالت وچ چیلنج کرن گے۔ اے کے پارٹی جیس دا مڈھ اسلامی ہے ترکی دی پارلیمنٹ وچ اہنوں محفوظ اکثریت ہے۔ آئین وچ ترمیم دیاں صلاحواں بدھ نوں پارلیمنٹ وچ منظور کر لیأاں گئیاں سن تے اخیرلے ووٹ لئی ہفتے دا دن متھیا گیا سی۔
ترکی دیاں یونیورسٹیاں وچ سر تے حجاب پاؤن تے اُنی سو ستانوے توں ڈاڈھی روک ہے۔ ایہہ روک اُس ویلے لگی سی جدوں سیکیولر فوج نے اودوں دی حکومت نوں بوہتا اسلام پسند سمجھدیاں ہوئیاں ایس تے دبا پایا سی۔
