ایس واری الیکشن وچ 60 زنانیاں قومی اسمبلی دیاں سیٹاں تے الیکشن لڑ رہیا ہیں جیہناں چوں بوہتیاں آزاد امیدوار ہین۔ الیکشن کمیشن ولوں ملن والی جانکاری موجب 60 زنانیاں وچوں 33 زنانیاں آزاد امیدوار ہین جدوں کہ باقی دیاں زنانیاں کسے ناں کسے پارٹی ولوں الیکشن لڑ رہیاں ہین۔
پاکستان پیپلز پارٹی ولوں 14 زنانیاں الیکشن لڑ رہیاں ہین، مسلم لیگ ق ولوں 8، مسلم لیگ نواز ولوں 7تے ایم کیو ایم ولوں 5 زنانیاں الیکشن لڑ رہیاں ہین۔ کجھ زنانیاں ایہو جہیاں وی ہین جیہڑیاں اک توں ودھ حلقیاں وچوں الیکشن لڑ رہیاں ہین۔ اہناں وچوں سر کڈھویاں زنانیاں مسلم لیگ نواز دی تہمینہ دولتانہ وہاڑی دے دو حلقیاں NA-168 تے NA-169 توں الیکشن لڑ رہیاں ہین۔ مینا احسان لغاری ڈیرہ غازی خان دے حلقے NA-173 تے NA-174 توں لڑ رہیاں ہین۔
زنانیاں دا آپو وچ مقابلہ: کجھ حلقیاں وچ زنانیاں دے مقابلے تے زنانیاں الیکشن لڑ رہیاں ہین تے بڑا بھرواں مقابلہ ہووے گا۔ جھنگ دے حلقے NA-78 وچ پیپلز پارٹی دے سیدہ صغریٰ امام تے ق لیگ دی غلام بی بی بھروانہ وچ بھرویں مقابلے دے آس کیتی جا رہی ہے۔ لہور دے حلقے NA-130 وچ پیپلز پارٹی دے ثمینہ خالد گھرکی تے مسلم لیگ نواز دی سعدیہ شبیر وچکار مقابلہ ہووے گا۔
وہاڑی دے حلقے NA-168 وچ تہمینہ دولتانہ دا مقابلہ اثیم دولتانہ نال ہووے گا۔ ٹنڈوالہ یار تے متراری دے حلقے NA-223 وچ پیپلز پارٹی دی شمشاد ستار بچانی دا مقابلہ عابدہ گل مگسی نال ہے۔ اک ہور بھرواں مقابلہ پیپلز پارٹی دی ڈاکٹر فہمیدہ مرزا تے ق لیگ دی بی بی یاسمین شاہ وچکار حلقہ NA-225 وچ ہووے گا۔
صوبائی اسمبلیاں دیاں سیٹاں تے کُل 98 زنانیاں الیکشن لڑ رہیاں ہین جیہناں وچوں 83 آزاد امیدوار ہین۔ مسلم لیگ نواز نے 13 زنانیاں نوں صوبائی اسمبلی دیاں ٹکٹاں دتیاں نیں، ق لیگ نے 8، پیپلز پارٹی نے 6 تے ایم کیو ایم دیاں 5 زنانیاں امیدوار ہین۔
ورھے 2002ء دیاں چوناں وچ قومی اسمبلی دیاں جنرل سیٹاں تے 12 زنانیاں سدھے چون راہیں کامیاب ہوئیاں سن۔
