اپنی پڑپوتی دی جمن والی پوتی نوں غسل دیندی مریم عماش دا آکھنا ہے جو اوہنوں آپوں ایس دنیا وچ آئیاں اک سو ویہہ ورہے ہو گئے ہین۔ خاندان وچ جمن والے نیانے نوں عرب ریتاں موجب غسل دینا اوہ کم ہے جیہڑا مریم کئی وار کر چکیاں ہین۔
جے اپنی عمر دے حوالے نال مریم عماش دا دعویٰ ثابت ہو جاوے تے اوہ دنیا دی سب توں بڈھی زنانی ہے کیوں جو گینیز بک آف ریکارڈز موجب دنیا دے سب توں بڈھڑے بندے ہوون دا اعزاز امریکی ریاست انڈیانا دے علاقے شلبی ویل دی ایڈنا پارکر دے کول ہے جیہڑیاں اک سو چوداں سالاں دیاں ہین۔
پر مریم عماش جیہڑیاں کہ دکھنی اسرائیل دے اک عرب قصبے جسرالزرقا وچ رہندیاں ہین آپنے آپ نوں سب توں بڈھی گن دیاں ہین۔ اوہناں دا دعویٰ ہے ' ہاں میں دنیا دی سب توں بڈھڑی انسان آں'۔ میں کھانی پینی آں، نہاونی آں تے مینوں ہور دس ورہے جیوندیاں رہن دی آس ہے'۔
مریم عماش دے سب توں بوہتی بڈھی ہوون دا معاملہ اُس ویلے ساہمنے آیاجدوں اوہناں نے نویں اسرائیلی شناختی کارڈ لئی درخواست دتی۔ اسرائیلی پربندھیاں دا آکھنا ہے جو اوہناں نے مریم نوں شناختی کارڈ ترکاں ولوں جاری کیتیاں ہوئیاں دستاویزاں دے مڈھ تے جاری کیتا ہے جیہڑے اُس ویلے علاقے دے حکمران سن۔
مریم اپنی صحت تے لمی عمر دا راز مناسب خوراک نوں آکھ دیاں ہین تے اوہناں دا آکھنا ہے جو اوہناں نوں سبزیاں بوہت پسند ہین۔ مریم عماش دے اپنے دس نیانے، اک سو ویہہ پوترے پوتریاں تے دھوترے دھوتریاں تے ڈھائی سو پڑپوتے تے پڑپوتیاں ہین جدوں کہ اہناں پڑپوتریاں تے پڑپوتیاں دیاں وی تریہہ اولاداں ہین۔
مریم دے پوترے چھتالی ورہیاں دے ماجد عماش موجب ' اوہ ہر روز سویرے نماز لئی پنج وجے اٹھ دیاں ہین۔ پھیر اوہ سیر لئی جاندیاں ہین تے اپنا بوہتا ویلا اپنے ٹبر نال لنگھاوندیاں ہین'۔ پر ماجد موجب اوہناں دی دادی دا چیتا چنگا نہیں۔
جے مریم عماش آپنے آپ نوں دنیا دا سب توں بڈھا انسان مناونا چاہندیاں ہین تے اوہناں نوں اپنی شناختی دستاویزاں لندن وچ گینز بک دے عملے نوں گھلنیاں ہوون گئیاں تے گینز بک دے عملے موجب اوہناں نوں حالی ایس قسم دی کوئی دستاویز نہیں ملی ۔
