گیاراں ورھیاں دی نیپالی کڑی سجنی شاکیہ، جیہنوں 'کماری' یاں 'جیوندی دیوی' آکھ بُدھ مت تے ہندو مذہب دے لوک پُوجدے سن نے اپنے گھر والیاں دے آکھن تے ایس مقدس فرض نوں چھڈ دتا ہے۔ ورھیاں بدھی رِیت موجب کھٹمنڈو دے نیڑے بھگت پور مندر وچ ایس کُڑی نوں نو ورھیاں تائیں بڑا آدر تے مان ملیا۔
سرکار ولوں مذہبی معاملیاں نوں ویکھن والے اک ٹرسٹ دے افسر دیپک پانڈے دا آکھنا ہے کہ اوہ ہن 'کماری نہیں رہی'۔ پانڈے دا آکھنا ہے کہ اوہدا ٹبر اوہنوں اپنیاں مذہبی رسماں موجب ویکھنا چاہندا سی جیہدے لئی ایہہ ضروری سی کہ اوہ ایہہ مقدس فرض نوں چھڈ دیوے۔ رِیت موجب جدوں کُڑی نوں ماہواری آؤن لگ پوے تے اوہ 'کماری' دے فرض توں ریٹائر ہو جاندی ہے۔
پچھلے ورھے سجنی عالمی میڈیا وچ اودوں آئی سی جدوں اوہ اک پرانیاں رِیتاں تے رسماں بارے بنی اک برطانوی فلم دی مشہوری لئی امریکہ گئی سی۔ کجھ مذہبی آگواں نے اوہدے ایس دورے نوں رِیت دی خلاف ورزی دسدیاں اوہدی نکھیدی کیتی سی تے اوہدے کولوں ایہہ عہدہ چھڈن دی منگ کیتی سی پر فیر ایہہ منگ واپس پرتا لئی گئی سی۔
کماری دی ریت موجب بُدھ مت دے نیوار ٹبر وچوں بڑی پُن چھان کر کے ریت رواج موجب اک کُڑی چُن لئی جاندی ہے تے اوہنوں 'جیوندی دیوی' آکھیا جاندا ہے۔ ایہہ منیا جاندا ہے کہ اوہدی وچ کالی دیوی دی روح وس جاندی ہے تے فیر ہندو تے بُدھ مت دے لوک اوہدی اودوں تیکر پوجا کردے ہین جدوں تیکر اوہنوں ماہواری نہیں آؤن لگ پیندی۔ ایس توں مگروں اوہ اپنے ٹبر وچ پرت جاندی ہے تے اک نویں دیوی لبھی جاندی ہے۔
پانڈے دا آکھنا ہے کہ اوہ ہُن سجنی دی تھاں کوئی نویں دیوی لبھ رہے ہین۔ انسانی حقاں لئی کم کرن والے کجھ لوکاں نے سپریم کورٹ وچ مقدمہ کیتا ہے کہ ایس رِیت نوں بند کیتا جاوے کیوں جے ایہدے نال کُڑیاں نوں حیاتی دے عام کار ویہار وچ پرتن لئی اوکھیائی ہندی ہے۔ سپریم کورٹ نے ایس بارے حالے کوئی فیصلہ نہیں دتا ہے۔
