Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> عورت سنسار >> ڈاکٹر رتھ فاؤ: اک جرمن زنانی جس سیوا پاروں ساڈے دل جت لتے

ڈاکٹر رتھ فاؤ: اک جرمن زنانی جس سیوا پاروں ساڈے دل جت لتے

وچار ڈیسک
August 21st, 2017

’’ساڈے وچوں بہوں سارے جنگ نوں ڈک نہیں سکدے۔۔۔پر اساں لوکائی دے دکھاں نوں ونڈ کے گھٹا سکدے ہاں۔۔۔اوہ دکھ جیہڑے جسم تے روح دے نیں‘‘
 ایہہ اکھر روتھ فاؤ دے نیں جیہڑی لوک سیوا دا نمونہ اتے جرمناں ولوں پاکستان گھلیا مسیحا سی۔اوہ نہ تے پاکستانی واسی سی اتے نہ ہی مسلمان پر اوس پاکستانیاں لئی جیہڑالوک سیوا دا کم کیتا اوس نوں پاکستان کدی بھلا نہیں سکدا۔اوہ بھری جوانی وچ پردیس آئی سی تے اوس کوڑھ دے بماراں نال حیاتی لنگھائی کہ گھٹ و گھٹ ایس بی بی بارے ساڈے سکولاں دی کتاباں وچ اک سبق تے ہونا ہی چاہیدا ہے۔1979وچ ہلال امتیاز،1989وچ ہلال پاکستان،2010وچ نشان قائداعظم لین والی ایس جرمن زنانی نوں انہاں دے مرن(10اگست2017)دے بعد ریاستی پردھانی وچ دفنایا گیااتے کراچی دے سول ہسپتال دا ناں روتھ فاؤ ہسپتال رکھ دتا گیا۔
جرمنی توں تعلق رکھن والی ڈاکٹر رتھ فاؤ نے اپنی حیاتی دے 57 سال پاکستان وچ انسانیت دی خدمت لئی دتے تے مردے دم تیک ایتھے ہی رہی۔ 8 مارچ دے اک گرم دیہاڑ، لوڈھے ویلے، اطالوی ائیر لائن، الیطالیہ، دی فلائٹ کراچی ائیر پورٹ اتری تے ایس چوں فرانس توں آن والے چٹی چمڑی والے یورپی شہری باہر نکلنا شروع ہوئے۔ انہاں لوکاں وچ اک 30 سالہ جرمن نژاد زنانی رتھ فاؤ وی سی۔ ایس وقت جداں پاکستان وچ کوڑھ دے مریض نوں اچھوت سمجھیا جاندا سی تے اپنے سگے رشتہ دار وی مریض نوں مرن لئی تنہا کسی ہور تھاں تے چھڈ آندے سن۔ اوس دور وچ جرمنی توں پاکستان آن والی ایس خاتون ڈاکٹر نے نہ صرف انہاں بماراں دی سیوا کیتی سگوں ایس مرض دے پاکستان توں خاتمے لئی اپنی ساری زندگی وقف کردتی۔ ڈاکٹر رتھ فاؤ 9 ستمبر 1929 نوں پیدا تے جرمنی وچ ہوئی پر انہاں دا دل پاکستان وچ دھڑکدا سی۔ ایس عظیم تے باہمت خاتون نے اپنی اکھاں نال دوجی عالمی کوڑ جنگ دی تبا کاریاں ویکھیاں اتے گولیاں وچ اپنے اکلوتے بھراء نوں مردے ویکھیا۔ جنگ دے دوران ہی ڈاکٹر رتھ اپنے والدین تے 5 بھیناں سمیت مشرقی جرمنی توں مغربی جرمنی منتقل ہوگئی جتھے اوس شعبہ طب وچ تعلیم مکمل کیتی ۔فیراوہ ’’ڈائرز آف ہارٹ میری ‘‘نامی تنظیم نال جڑگئی۔ جرمنی وچ جنگ دی تباہ کاریاں ویکھدے ہوئے ڈاکٹر رتھ نے شادی نہ کیتی اتے اوتھے جنگ توں متاثرہ لوکاں دی مدد کرن لگی۔ ایس دے بعد ڈائرز آف ہارٹ میری تنظیم نے انہاں نوں اسائمنٹ تے بھارت گھلن دا فیصلہ کیتا جتھے انہاں نے مدر ٹریسا نال ملاقات کرنا سی۔ پاکستان دی خش بختی کہ اوس نوں بھارتی ویزانہ ملیا۔اینج اوہ حادثاتی طور تے کراچی رک گئی۔ ایس زمانے وچ جرمنی دی سماجی تنظیم ڈائرزآف ہارٹ آف میری کراچی وچ میکلوڈ روڈ (آئی آئی چندر ریگر روڈ) تے سٹی سٹیشن دے نیڑے چھونپڑ پٹیاں وچ 1955 توں نِکی جہی ڈسپنسر وچ کم کر رہی سی۔
ڈاکٹر رتھ نوں اک وارڈسپنسری دا دوراہ کرایا گیا تے اوتھے دا منظر ویکھ کے انہاں توں نہ رہیا گیا کیوں کہ ڈسپنسری وچ کوڑھ دے مریضاں دا علاج پٹیاں کرکے کیتا جارہیا سی۔ ڈاکٹر رتھ نے جرمنی وچ اپنی تنظیم نوں لکھیا کہ بھارت دے بجائے انہاں دا اصل کم پاکستان وچ ہے تے اوہ ایتھے ہی خدمت کرنا چاہندی ہے۔ تنظیم ولوں اجازت ملن تے ڈاکٹر رتھ فاؤ نے پاکستان وچ پہلی وار کراچی دے علاقے برنس روڈ تے لپرسی سنٹر (جزام سنٹر) دی بنیادرکھی تے فیصلہ کیتا کہ میکلوڈ روڈ تے جھونپڑ پٹی وچ موجود کوڑھ دے مریضاں نوں ہسپتال منتقل کیتا جائے گا۔ ایس زمانے وچ کوڑھ دے مریضاں دے کول جان نوں وی خطرناک سمجھیا جاندا سی۔ ایس لئی مریضاں دی منتقلی دا کم رات دی تاریکی وچ کیتا جاندا کجھ دناں بعدوں مقامی لوکان نوں ہسپتال دا پتہ چلیا تے انہاں نے ہسپتال دے خلاف ہائیکورٹ وچ کیس دائر کردتا۔ ایس زمانے وچ اک تگڑے خاندان دی ڈاکٹر زرینہ فضل بائی نے ڈاکٹر رتھ دا ساتھ دتا تے کیس لڑن وچ بھرپور تعاون کیتا۔ انہاں نے عدالت نوں مطمئن کیتا تے فیصلہ حق وچ آن دے بعد لپرسی سنٹر نے باقاعدہ طور تے کم شروع کردتا ہے۔ ڈاکٹر رتھ نے مشاہدہ کیتا کہ کراچی دے لپرسی سنٹر وچ ملک بھر توں مریض آن لگے جس دے بعد انہاں نے 1965 وچ مقامی لوکاں نوں تربیت دینا شروع کیتی۔ روتھ ہوراں خاص طور تے خیبر پختونخوا تے شمالی علاقہ جات توں تعلق رکھن والے پیرا میڈکس نوں کوڑھ دے علاج دی تربیت دتی۔ ڈاکٹر رتھ فاؤ نے خود باہر نکل کے کوڑھ دے مریض توں متعلق شعور اجاگر کرن لئی کراچی دی سڑکاں تے ریلیاں کڈھیاں۔اوہ زنانی گرم ترین صحرائے تھر گئی، دشوار گزار پہاڑی علاقیاں دا دورہ کیتا تے سرحدی علاقیاں وچ موجود کوڑھ دے مریضاں دا علاج کیتا۔ سادہ جہے کپڑیاں وچ ملبوس تے مشرقی روایات وچ ڈھل کے ڈاکٹر رتھ ٹُٹی پھُٹی اردو وچ مریضاں نال گل کردی تے پاکستانی زباناں تے عبور حاصل نہ ہون دے باوجود اوہ مریضاں دا دکھ ونڈاندی تے جداں اوہ کوڑھ دے مریضاں نوں ہتھ لا کے علاج کردی تے ویکھن والے حیرت زدہ ہوجاندے۔ ملک وچ کوڑھ دے مرض دے خاتمے تے فلاحی کماں وچ ودھ چڑھ کے حصہ لین تے حکومت پاکستان نے انہاں نوں 1969 وچ ستارہ قائداعظم دے ایوارڈ توں نواز یاتے ایس وقت دے صدر جنرل یحییٰ خان توں میڈل وصول کیتا۔ ڈاکٹر نے 1975 وچ خیبر پختونخوا 1976 وچ بلوچستان تے 1989 وچ گلگت بلتستان وچ لپرسی سنٹر کھولے۔ 1986 وچ عالمی ادارہ صحت نے کوڑھ دے مریضاں لئی ملٹی ڈرگ تھراپی متعارف کرائی جیہڑی اس مرض تے قابو لئی سود مند ثابت ہوئی۔ ڈکٹیٹر صدر ضیاالحق نے مدر ٹریسا نوں پاکستان مدعو کیتا تے کراچی توں خصوصی طور تے ڈاکٹر رتھ نوں وی اسلام آباد بلایا گیا ۔ صدر ضیاالحق نے ڈاکٹر فاؤ نوں فیڈرل ایڈوائزر مقرر کیتا جس دے بعد پاکستان وچ جاری لپرسی پروگرام انہاں دے حوالے کردتا تے ڈاکٹر رتھ دی کوششاں دی بدولت 1996 وچ عالمی ادارہ صحت نے اعلان کیتا کہ پاکستان توں کوڑھ دے مرض تے قابو پان والا پہلا ایشیائی ملک بن گیا ہے۔اک زمانے وچ ہزاراں پاکستانی ہر سال کوڑھ دا شکار ہوندے سن پر ہن انہاں دی گنٹری چند سو ہے۔ ملک بھر وچ ڈاکٹر رتھ فاؤ دے بنائے 157 سنٹر کم کررہے نیں جس وچ نہ صرف کوڑھ دے مریضاں دا سگوں اندھے پن دے کنٹرول، زچہ بچہ دی دیکھ بھال اتے تپ دق دے مریضاں دا وی علاج کیتا جاندا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels