صدر بش نے عورتاں دے عالمی دیہاڑ دے حوالے نال سارے جگ وچ عورتاں نوں سلاہیا گیا ہے۔ جدوں کہ امریکی وزیر خارجہ کونڈا لیزا رائس ولوں دنیا دے کئی حصیاں نال تعلق رکھن والیاں اٹھاں زنیاں نوں انٹرنیشنل وومن آف کریج ایوارڈز دتے۔ ایوارڈز لین والیاں وچ اک پاکستانی زنانی ڈاکٹر بیگم جان وی رلتی ہین۔
ایوارڈ دا ایہہ اکٹھ واشنگٹن ڈی سی وچ زنانیاں دے عالمی دیہاڑ دے حوالے نال ہوون والے اکٹھاں وچوں سب توں اہم سی۔ اسٹیٹ ڈیپارٹمنٹ ولوں ایہہ ایوارڈ اک سال پہلاں شروع کیتے گئے ہین جیہڑے اوہناں زنانیاں نوں دتے جاندے ہین جنہاں نے زنانیاں دے حقاں تے معاشرتی انصاف لئی بوہت کم کیتے ہوون۔
ایوارڈ لین والیاں وچ افغانستان دی ثریا پاک زاد، عراق دی ڈاکٹر ایمان الجبوری، فلسطین دی نیبل تے صومالیہ دی فرحیہ فرح ابراہیم دے نال نال پاکستان دے قبائلی علاقے جنوبی وزیرستان نال تعلق رکھن والی ڈاکٹر بیگم جان وی رلتی ہین۔ کوسوو، پیرا گوئے تے فجی دیاں زنیاں وی ایوارڈ لین والیاں وچ رلتی سن۔
ایوارڈ دیاں اٹھاں عورتاں دا چون پچانوے عورتاں وچوں کیتا گیا سی جنہاں نوں سارے جگ وچ قائم امریکی سفارت خانیاں ولوں نامی نیٹ کیتا گیا سی۔ ڈاکٹر بیگم جان قبائلی علاقے وچ زنانیاں دی صحت تے تعلیم لئی ٹرائبل ویمن ویلفیئر ایسوسی ایشن دے ناں توں اک غیر سرکاری ستھ چلا رہیاں ہین۔
امریکی وزیر خارجہ کونڈا لیزا رائس نے ایوارڈ لین والیاں زنانیاں نوں سلاہیا تے آکھیا زبان تے رنگ نسل دے فرق توں مگروں وی ایہہ زنانیاں اپنے اپنے ملک وچ انسانی وقار نوں اُچا کرن دی جدوجہد کر رہیاں ہین۔ اوہناں نے آکھیا جو ایہہ زنانیاں ساری دنیا دیاں زنانیاں دی نمائندہ ہین جیہڑیاں قربانیاں دے کے جدوجہد کر رہیاں ہین تاں جو اگے اوہناں دی نویں نسل نوں انسانی حقاں، انصاف تے جمہوریت تیکر رسائی تے خشحالی ہووے۔
ایہہ اٹھ زنانیاں خورے اینیاں مشہور نہیں ہین جنی میانمار دی آں ساں سوچی ہین یاں بینظیر بھٹو سن جنہاں نے جمہوریت لئی اپنی جان دتی۔ پر ایہہ زنانیاں اپنے اپنے ملک دی زنانیاں لئی مثال ہین جیہڑی آزادی تے مثبت بدلی دی جدوجہد کر رہیاں ہین۔
اسٹیٹ ڈیپارٹمنٹ ولوں دتا جاون والا ایہہ ایوارڈ سماجی انصاف تے زنانیاں دے حقاں لئی کم کرن والیاں زنانیاں نوں پیش اوکڑاں نوں دور تے نہیں کردا پر اوہناںنوں اپنی جدوجہد جاری رکھن لئی ہلاشیری ضرور دے سکدا ہے۔
