کرسٹین: جِس نے نیویارک ریاست ہلا دتی، گورنری بدل دتی

جیس کُڑی پاروں نیویارک ریاست دے گورنر ایلیٹ سپٹزر نوں پان پت گوا کے گورنری چھڈنی پئی اوہ کڑیاں سپلائی کرن والی کمپنی ایمپررز کلب وی آئی پی وچ کرسٹین دے ناں نال جانی جاندی ہے۔ اوس نوں گورنر لئی اک ہزار ڈالر فی گھنٹہ دے حساب تے بُک کیتا گیا سی۔ ایہہ کلب بعض کڑیاں لئی ترتالی سو ڈالر فی گھنٹہ وی چارج کردی ہے۔کرسٹین پہلی واری واشنگٹن می فلاور ہوٹل وچ گورنر نال رہی پر ایس بارے پتہ نہیں لگا جو پھیر کنی واری گورنر نوں ملی۔

کڑی دا اصلی ناں کرسٹین نہیں ایشلی الیگزنڈرا ڈوپرے ہے۔ ماں پیو نے اوس دا ناں ایشلی یومنز رکھیا سی پر اوس نے ایہہ بدل لیا تے ہن اوہ مس ڈوپرے دے ناں نال جاندی ہے۔

کڑی دا ٹبر ٹٹیا بھجیا ہے تے اوہ ستاراں سالاں توں ہی اک ریاست چوں دوجی ریاست وچ ٹھکانے بدلدی رہی ہے۔ اوہ پیشہ ور گویا بننا چاہندی سی تے بننا چاہندی ہے اوس دی ویب سائٹ تے اوس دے گائے گانے وی ہین۔

نیویارک سکینڈل تے اوس دے بھرا کائل یومنز نے کہیا میری بھین دل دی مضبوط ہے تے اوہ ایس جھیڑے نوں سنبھال سکدی ہے۔ اوس دی ماں نے کہیا جو میری دھی ہے تے بڑی ہوشیار پر اوہ اجے بائی سالاں دی ہے تے اوس نے جپھا وڈی چیز نوں مار لیا ہے۔