ہندوستان دی ریاست گجرات دے شہر آنند وچ پچھلے تن ورھیاں وچ ملک دی کسے وی ریاست دے مقابلے وچ سبھ توں ودھ کرائے دیاں ماواں نے بال جمے ہین۔ عام طور تے جدوں زنانی کسے وجہ توں آپ بال نہ جم سکے تے بندے دے نطفے تے زنانی دے بیضے نال لیبارٹری وچ جنین تیار کر کے ایہنوں کسے صحت مند زنانی دی ککھ وچ رکھ دتا جاندا ہے جتھے ایہہ جنین قدرتی عمل ہیٹھ آؤندے ہین تے متھے ہوئے ویلے تے بال جم پیندا ہے۔
گجرات دیاں زنانیاں جیہڑیاں غربت پاروں اپنے گھروکی مسئلیاں وچ کھبیاں ہوئیاں ہین ایس کم ول آ رہیاں ہین۔ روبینہ منڈل وی اہناں زنانیاں وچوں اک ہے۔ جدوں اوہنوں ایس بارے پتہ لگا تے اوہ فوراً آنند پج گئی تاں جو کسے دا بال جم کے اپنے بچیاں دے علاج لئی پیسہ اکٹھا کر سکے۔ ایسے طرحاں پشپا پانڈے اپنا گھر بناؤنا چاہندی سی۔ کرائے دی ماں بن کے اوہنے اپنا ایہہ سُفنا پورا کیتا تے ہن دوجی واری کرائے دی ماں بن کے اپنا ادھار لاہ رہی ہے۔
عام طور تے اک کرائے دی ماں نوں ڈھائی لکھ توں چھ لکھ روپئیے لبھدے ہین۔ ایہہ رقم پیسے دین والے دی پسلی (حیثیت) مطابق ہندی ہے۔ بوہتے گاہک برطانیہ تے امریکہ توں آؤندے ہین کیوں جے اوتھے بال جمنا اک مہنگا کم ہے۔ ورھے ٢٠٠٥ تے ٢٠٠٦ وچکار کاؤل ہسپتال وچ ٣٥ بال کرائے دیاں ماواں نے جمے سن تے ٢٠٠٧ وچ ایہہ گنتی ودھ کے ٥٥ ہو گئی سی۔
ایہہ کم اودوں شروع ہویا سی جدوں برطانیہ وچ رہن والی اک گجراتی زنانی نے اپنی ماں دی ککھوں اپنا بال جموایا سی۔ کسے جسمانی خرابی پاروں اوہ آپ ماں نہیں بن سکدی سی۔ ایہہ کم کرواؤن والی اک ہندوستانی ڈاکٹر پٹیل دا آکھنا ہے کہ جدوں اوہ باہرلے ملک ایہہ کم کردی ہے تے اوہنوں اٹھاراں سو ڈالر ملدے ہین پر ہندوستان وچ اُکا چھ ست سو ڈالر ای ملدے ہین۔ پر ہندوستان وچ باہرلے ملکاں نالوں گھٹ مہنگائی ہے۔
ہندوستان وچ کرائے دیاں ماواں بارے حکومت دا سبھاء وی چنگا ہے۔ سرکار دا آکھنا ہے کہ ہندوستانی قانون موجب زنانی نوں کرائے دی ماں بنن دا حق حاصل ہے۔
