کھوجاں مطابق بوہتیاں شوخیاں کُڑیاں نوں جوان ہون تے اوکڑاں جرنیاں پے سکدیاں ہن۔
21 ورہیاں دیاں 800 کُڑیاں تے کیتے گئی اک کاہڈ توں دس پئی اے کہ کُڑیاں وچ شوخ پُنے کارن جوان ہون تے اوہناں دیاں نوکریاں نوں خراب ہون دا ڈر، ناجائز سانگے تے گھٹ عمر وچ جنسی بیماریاں دا کارن بن سکدے ہین۔
ایس توں پہلے کیتی گئی اک پڑچول وچ بچپن وچ کُڑی دے شوخ پُنے تے گوہ کیتا گیا سی جیس توں پتہ لگا سی کہ کُڑیاں وچ شوخ پنے نوں بوہتی اسانی نال پچھانیا تے علاج کیتا جا سکدا ہے۔ کینیڈا تے انگلینڈ دیاں ایہہ کھوجاں "جنرل سائکلوجی میگزین ' وچ چھپیاں نیں۔
کھوجیاں دا مننا اے پئی انج دیاں بوہتاں شوخیاں کُڑیاں دے سرپرستاں نوں سکولاں وچ اوہناں دی چنگی کارکردگی لئی مُڈھ توں ای ایہناں رمزاں نوں سیہان کے اوہناں دی مدد کرنی چاہیدی اے۔
چھے توں 21 ورہیاں تیک دیاں کُریاں تے کیتی گئی ایس پڑچول وچ اُپر تھلے، ارام نال بیٹھن تے بے چینی دے چالیاں دی پڑچول کیتی گئی۔
مونہہ زوری
کھوجکاراں نے ایہناں نوں جسمانی ویہاراں دے پدھر تے وی پرکھیا جیویں لڑنا جھگڑنا، مار کُٹ کرنا، اُٹھ پُٹھ کرنا، چک وڈھنا وغیرہ۔
ہر دساں وچوں اک کڑی وچ شوخ پُنا اُچچ پدھر تے ملیا جد کہ دوجیاں کُڑیاں وچ شوخ پُنا اُچچ پدھر دے نال نال جسمانی مونہہ زوری دا ورتارا وی لبھیا۔
ایس پڑچول دے مطابق سبھ توں ودھ شوخی یاں مونہہ زور کڑیاں نوں دُونے توں وی بوہتا سگریٹ پین دا اَل پے جاندا ہے نالے ناجائز تعلقات وچ ٹُٹ جاون دے آثار دُونے توں بوہتے ہو سکدے ہین تے سکولاں وچ اوہناں دی کارکردگی چار گُنا خراب ہو سکدی ہے۔
جد کہ شوخی تے مونہہ زوری دونویں ورتاوے والیاں کُڑیاں وی مگروں گھٹ عمر وچ جنسی بیماری دے مسئلیاں توں وکھ اپنے سنگی واسطے جسمانی تے ٹُٹ کے چاہنا وی ویکھیا گیا اے۔
اک چوتھائی شوخیاں کُڑیاں وچ مگروں کوئی روگ نہیں پایا گیا۔
یونیورسٹی کالج لندن دے کھوجکاراں تے ایس کھوج دے مُکھی ڈاکٹر نتھالی فونٹین نے کیہا اے " ہُن توں پہلاں کُڑیاں وچ بوہتی شوخی بارے بوہت گھٹ کھوج ہوئی اے۔"
سکول وچ کارکردگی۔
اوہناں دَسیا کہ " کُریاں دے مقابلے منڈیاں وچ شوخی بوہتی ہندی ہے لیکن جیہڑے مُنڈیاں وچ ایہہ ہندی ہے، اوہناں وچ مگروں بوہتیاں مسئلیاں دے پیدا ہون دا خطرہ ہندا اے۔"
اوہناں دا آکھنا اے کہ ایہہ گل نویں نکور اے کیونجے بوہتے مسئلے تے سکولوں توں ای خراب کارکردگی نال پیدا ہوجاندے نیں۔ اوہناں د ے مطابق " ایس کھیتر وچ بوہتے کھوج کرن دی لوڑیندی ہے تانجے اجیہے مسئلیاں دے ودھن دے کارناں تے بچاء دے اُپاء نوں سمجھیا جا سکے۔"
ساؤتھ ویسٹ لندن وچ بال تے کشور سائکالوجی دے صلاح کار ڈاکٹر موریس وی کہندے نیں کہ اجیہے سَٹے شوخے منڈیاں وچ وی ویکھے گئے نیں۔
اوہناں دے مطابق " بوہتے شوخے منڈے وچ وی ہندے نیں تے اسیں ایس دے کارناں بارے جانکاری نہیں رکھدے۔" اوہناں کیہا کہ " کُڑیاں وچ دھیان ٹُٹ ہون دے لچھن بوہتے ہندے نیں ایس لئی اوہناں نوں انج ای چھڈ دتا جاندا ہے کیونجے اوہ ہور پریشانیاں پیدا نہیں کردیاں۔"
