پاکستان دی پہلی سکی ار سرمائی اولمپکس وچ حصہ لینا چاہندیاں ہین

پاکستان دی پہلی زنانی ' سکی ار' انمار حبیب نے اعلان کیتا ہے جو اوہ دو ہزار دس دے سرمائی اولمپکس کھیڈاں وچ پاکستان دی نمائندگی دا ارادہ رکھدیاں ہین۔ انمار جنہاں نوں ' اے جے' وی آکھیا جاندا ہے، نے دو ہزار دو وچ سکی انگ دے بین الاقوامی مقابلے وچ پاکستان دی نمائندگی کیتی سی۔

اٹھاراں سالاں دی اے جے امریکی ریاست نارتھ کیرولائینا وچ ہائی سکول دی پڑھیار ہین۔ اوہ امریکہ دے سب توں چنگے سکی انگ ٹریننگ سنٹر شوگر بول توں سکھ رہیاں ہین۔ہن صرف پاکستانی سکیئر سگوں کلی زنانی سکیئر اے جے دا آکھنا ہے جو اوہ پہلی پاکستانی تے پہلی زنانی ہوونا چاہندیاں ہین جیہڑیاں ایہہ سرمائی اولمپکس وچ پاکستان دی نمائندگی دا کارنامہ کر سکن۔ اوہ آکھدیاں ہین جو اوہناں دی نمائندگی زنانیاں دی ہلاشیری دا کارن بنے گی۔

پاکستان وچ سکی انگ اینی مشہور نہیں بھاویں شوقین لوک سوات دے تفریحی مقام مالم جبہ وچ واقعی سکی انگ میدان وچ پریکٹس کردے ہین۔ اے جے دا ارادہ ہے جو اوہ چین تے پاکستان دے وچکار ست سو میل لمی قراقرم پہاڑی سلسلے دیاں تیسیاں تیکر اپڑ سکن۔ اوہناں دا آکھنا ہے جو ایس مقصد لئی اوہناں نوں امریکہ توں اسلام آباد، پھیر تقریباََ اٹھاراں گھنٹے دے لمے سفر توں مگروں گلگت جاونا پوے گا، جیس توں مگروں پاکستان ایر فورس دے قائم نلتر سکی انگ کورس وچ سکی انگ کرن گے۔

اے جے نوں آس ہے جو شمالی علاقیاں وچ شدت پسنداں دا اثر رسوخ مکن نال اوتھے سیاحت ودھے گی تے ایس کھیڈ دے ہور شوقین نظر آون گے۔